Kólginov: Maǵan jumys qarqyny unamaıdy!

Nur-Sultan ákimi Altaı Kólginov kezekti ret problemaly turǵyn úı nysandaryn aralady Qamshy.kz aqparat agenttigi ákimdikke silteme jasap.

Keshki aralaý ýaqytynda birinshi bop barǵan jeri - "Jeti jol" turǵyn úı kesheni boldy. Atalǵan úıdiń qurylysy 2013 jyly bastalǵan, 2015 jyly nysan problemaly dep tanylǵan. Úleskerlerdiń sany – 600 adamǵa jýyq. 

Altaı Kólginov qurylys qarqyny kórinbeıtinin atap ótti.

"3 apta buryn kezdestik. Qurylys baıaý júrip jatyr. Maǵan jumys qarqyny unamaıdy. Bastaǵannan keıin aıaqtaý kerek. Eger siz de osyndaı ustanymdy ustansańyz, sizdiń aldyńǵy qurylys salýshydan esh aıyrmashylyǵyńyz bolmaıdy ǵoı. Biz sizge jobalaý jumystary boıynsha kómektesip, barlyq máselelerdi zerdelep otyrmyz. Tezdetý kerek, qurylys maýsymy aıaqtalyp qaldy", - dedi shahar ákimi.

Qaıta aralaǵan ekinshi obekt - "Komfort" TK boldy. Bul nysan 2015 jyly problemaly bop tanylǵan. Úleskerlerdiń sany – 227 adam. Qurylys salýshy atalǵan nysanda jumys júrgizilip jatqanyn, jumysshylardyń ekinshi aýysymy týraly másele qaralyp jatqanyn atap ótti. Qazirgi kezde olar ınjenerlik jeliler jobasyn kútýde.

"Bul qarqyndy toqtatpańyz. Qysqa merzimde nátıje kórsettińiz, jumys júrgizilgeni baıqalady. Injenerlik jelilerdiń jobasyn alǵannan keıin, abattandyrý máseleleri boıynsha jumysty bastaý kerek", - dep atap ótti A.Kólginov.