Mańǵystaýda órt oqıǵasy 10 paıyzǵa azaıǵan

Jyl basynan beri oblys aýmaǵynda 126 órt  oqıǵasy tirkelgen. Bul kórsetkish  2018 jylmen salystyrǵanda  10%-ǵa azaıyp otyr.  Oryn alǵan oqıǵalardan  2 adam qaza taýyp, 4 adam zardap shekken. Derekterge súıensek,  tirkelgen  órt oqıǵasynyń kóp bóligi turǵyn úılerde oryn alǵan. Sondaı-aq, avtokólikterde de 44  órt oqıǵasy boldy. Mamandardyń aıtýynsha,  órt oqıǵalarynyń aldyn alyp, azaıtý maqsatynda turǵyndarǵa ótkizilgen úgitteý-profılaktıkalyq jumystar nátıjesinde órt sany aldyńǵy jylmen salystyrǵanda  20%-ǵa azaıǵan. Búginde adamdardyń qaza bolýyn, jaraqattanýyn aldyn alý jáne órt oqıǵalarynyń sanyn azaıtý maqsatynda turǵyndarǵa qaýipsizdik erejesin túsindirýge kóp kóńil bólingen. Atap  aıtsaq, senbilikter ótkizilip, úı ıelerine jadynamalar taratylyp, reıdter júrgizilgen.

«О́rt qaýpi basym shilde-tamyz aılarynda órt oshaqtaryn anyqtaý maqsatynda ǵaryshtyq monıtorıng júrgizilmek. Josparǵa sáıkes, oblystyq ákimdikten 4 mln teńge bólinip, tıisti  jumystar atqarylmaq. О́rt oshaǵyn erterek anyqtap, kezekshilerge der kezinde ǵaryshtyq monıtorıng arqyly dabyl qaǵylǵan jaǵdaıda, tez arada qyzmet etý úshin   qazirgi tańda 25 maman arnaıy oqytyldy», - dedi Mańǵystaý oblystyq tótenshe jaǵdaılar departamentiniń bastyǵy Qýanar Bazarbaev.

Mamandardyń aıtýynsha, búginde beleń alyp turǵan avtokólikterdegi órt oqıǵalaryn  boldyrmaý maqsatynda jergilikti polısııa qyzmeti ókilderimen birigip, qalalyq jáne aýdandyq bólimshelermen reıd ótkizilip, júrgizýshilerge   1000 asa jadynama taratylǵan.  Qoǵamdyq oryndarda jáne adamdar kóp shoǵyrlanatyn jerlerde  órt qaýipsizdik talaptaryn túsindiretin 6 bılbord ornatylǵan.