Maýsym aıynyń orta sheninde Shyǵys Sibirdiń Irkýt oblysy, Krasnoıar aımaǵy, Saha Respýblıkasy kóleminde aýqymdy orman órti bastaldy. Ný jynysty joımaq bolyp óńmeńdegen qyzyl jalynnan shyqqan tútin kórshi oblystarǵa, tipti shekaralas memleketterge deıin jetti. Al áleýmettik jelidegi halyq ormandy qutqarýdy surap, birinen keıin biri surap shýlaýda.

«Osydan birer aı buryn Parıj qalasyndaǵy «Notr-Dam» shirkeýi órtke oranǵanda kúlli álemniń nazary túsip, qarjy jınap edi. Al tabıǵat keremetin qurban etip qarap otyrǵanymyz jaramady». Kópshiliktiń pikiri osy tusta birigip otyr.

Sibir ormandarynda jyl saıyn órt tutanyp, myńdaǵan gektar jerdi jaıpap ótedi. Ár jyl saıyn eriktiler órttiń aldyn alý sharalaryn júrgizetini de ótirik emes. Biraq bul jyly órttiń jyldam kúsh alǵany sonshalyq, Irkýt oblysynyń turǵyndary basqa jerge qonys aýdaryp ta úlgermegen. Tútin jutyp, ys ıiskep otyr-mys.

О́rt asa úlken jyldamdyqpen taralyp keledi. Tipti, Bodaıbo aýdanyna qarasty Svetlyı aýylyna úsh qana shaqyrym qalǵan. Degenmen, basshylyq eldi-mekenderge tóner qaýip joq dep sendirýde. Halyq qonystanǵan keı qalalar orman tútininiń áserinen áýe reısterin toqtatýǵa májbúr bolǵan.

Qazirgi ýaqytta Krasnoıar ólkesine jaqyn mańda 850 myń gektar taıga ormany órtengen. Bul – 24-shildedegi kórsetkish. Al dál qazir bul kórsetkish eselenbese, azaımaǵany anyq. Respýblıkadaǵy eń iri órt sóndirý ortalyǵy ornalasqan bul ólkeniń halqy tútinge tunshyǵyp otyrýy – uıat.

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir