Mınıstr Zarechnyı túrmesi jaıly: "Bul masqara!"

Ishki ister mınıstri Erlan Turǵymbaev Zarechnyı túrmesinde bolǵan jaǵdaıǵa qatysty túsinikteme berdi dep habarlaıdy Qamshy.kz aqparat agenttigi Sputnik Qazaqstan saıtyna silteme jasap.

"26 shildede áleýmettik jelilerde vıdeo taralyp ketti. Onda Almaty oblysynyń Zarechnyı kentindegi túrmede sottalǵandarǵa zorlyq-zombylyq kórsetý faktileri jarııalanǵan. Men birden qyzmettik tekseris jiberdim. Kolonııaǵa ishki qaýipsizdik mamandary bardy", - dedi Turǵymbaev.

Mınıstrdiń aıtýynsha, osy ýaqytqa deıin 40 vıdeo men aýdıo jazba zerdelenip, sottalǵandarǵa zorlyq kórsetý faktileri rastaldy. Keshe tártiptik komıssııanyń sheshimimen 14 qyzmetker tártiptik jazaǵa tartyldy. Olardyń ishinde 7-i ishki ister organdarynan shyǵaryldy. Túrmeniń eki orynbasary men mekeme bastyǵy da jumystan bosatyldy.

"Keshe shuǵyl sharalar barysynda mekemeniń 5 qyzmetkeri ustalyp, eki qylmystyq is qozǵaldy. Sol bes adamnyń ishinde túrme bastyǵynyń orynbasary da bar. Tergeý jalǵasýda, eki kúnniń ishinde tıisti shara qabyldanady. Shyny kerek, ondaı fakt qylmystyq atqarý júıesi úshin masqara. Biz basqa mekemelerdi de tekseretin bolamyz", - dedi Turǵymbaev.