Qazaqstandyqtar memqyzmetshilerge onlaın shaǵym jasaı alady

Memlekettik qyzmetshilermen qyzmettik etıkany buzý faktileri týraly onlaın habarlaýǵa bolady dep habarlaıdy Qamshy.kz aqparat agenttigi. 

Bul týraly QR Memlekettik qyzmet isteri agenttiginiń qoǵammen baılanys departament basshysynyń orynbasary Janna Bastarova aıtty.

"Agenttiktiń jańa saıtynda (qyzmet.gov.kz) memlekettik qyzmettegi bos oryndar týraly bilýge bolady. Jańa saıtty 2 apta boıy testileýden ótkizdik. Memlekettik jáne quqyq qorǵaý qyzmet etýge yntasy bar azamattar úshin «Memlekettik qyzmetke túskim keledi» arnaıy bólimi iske qosyldy. Jáne ol jerdegi aqparat kúndelikti jańartylyp turady. Sonymen qatar, ol bólimde respýblıkalyq jáne óńirlik deńgeılerde memlekettik ákimshilik laýazymdarǵa ornalasýǵa arnalǵan baıqaýlar týraly habarlandyrýlar jarııalanady", - dedi Janna Bastarova.

Sondaı-aq, agenttik ókili endigi ýaqytta memlekettik qyzmetshilerdiń ádepsiz minez-qulqyna onlaın túrde shaǵymdaný múmkindigi paıda bolǵanyn aıtyp ótti.

"Memlekettik qyzmetshilermen qyzmettik etıkany buzý faktileri týraly habarlaý úshin "Ádepsiz minez-qulyq týraly habarlaý" bólimi jumys jasaıdy. Ol jerde beıádep qylyq kórsetken memlekettik qyzmetshiniń aty-jóni men qyzmetin qaldyrady. Jáne ýaqytyn kórsetý qajet. Odan ári ol shaǵym Memlekettik qyzmet salasyndaǵy baqylaý deprtamentine jóneltiledi. Ondaǵy mamandar máseleniń mán jaıyn anyqtap tekseredi. Odan bólek, atalǵan bólimde departament basshylarynyń jumys telefondary kórsetilgen. Iаǵnı, basshylyqqa tikeleı habarlasyp aıtýǵa da bolady", - dedi ol.