Qyrǵyzstan men Tájikstan shekarasynda atys boldy

Qyrǵyz-tájik shekarasynda qaqtyǵys boldy, zardap shekkender bar dep habarlaıdy Qamshy.kz aqparat agenttigi sputniknews.kz saıtyna silteme jasap. 

Qyrǵyzstannyń memlekettik shekara qyzmetiniń baspasóz qyzmetiniń málimetinshe, Vorýh (Tájikstan) aýylynyń turǵyndary eldi mekenge kireberiste týtuǵyr ornatqysy kelgen, al Ak-Saı (Qyrǵyzstan) halqy buǵan qarsy bolǵan. Kıkiljiń barysynda taraptardyń biri qarý qoldanypty. Memlekettik shekara qyzmeti habarlaǵandaı, oq atqandar qarapaıym turǵyndar bolýy múmkin, sebebi ańshy myltyǵy qoldanylǵan, dep habarlaıdy.

Tájikstannyń ulttyq qaýipsizdik memlekettik komıteti shekara áskeriniń derekteri boıynsha, bir Tájikstan azamaty qaza tapqan, úsheýine oq tıip, taǵy jeteýi ártúrli deńgeıde jaraqat alǵan. Qyrǵyzstannyń memlekettik shekara qyzmeti budan buryn habarlaǵandaı, Tájikstanmen shekaradaǵy atys saldarynan bes adam zardap shekken.

Oqıǵa ornynda Tájikstan men Qyrǵyzstannyń shekara vedomstvolarynyń resmı ókilderi, eki eldiń qarýly kúshter jáne quqyq qorǵaý organdarynyń qyzmetkerleri jumys istep jatyr.

Qyrǵyz-tájik shekarasyndaǵy ahýal kúrdeli, biraq baqylaýda, dep habarlady Qyrǵyzstannyń memlekettik shekara qyzmeti. Qazir bılik ókilderi halyqqa túsindirý jumystaryn júrgizip jatyr.

Qyrǵyz-tájik shekarasynda oqta-tekte qos memleket turǵyndary arasynda qaqtyǵystar bolyp turady. Qaqtyǵystyń sebebi kóbinese - mejelenbegen aýmaqtar.