Qaldybek Qurmanáli: "Kámshatqa jáne sol sekildi qyzdarǵa janym ashıdy" (vıdeo)

Ár juma saıyn kórermenge jol tartatyn "Qamshy suhbat" habarynyń kezekti qonaǵy — belgili kompozıtor, shámshitanýshy Qaldybek Qurmanáli. Suhbat barysynda Qaldybek Qurmanáli Shámshi Qaldaıaqovtyń qaryndasymen nege sózge kelip qalǵanyn túsindirip, qazirgi qazaq estradasyndaǵy ánshi qyzdar týraly pikir bildirdi.

— Qazir mán-maǵynasyz, qoıyrtpaq ánder kóbeıdi. Tipti kórermenderdi tartý úshin neshe túrli beınebaıandar da shyǵyp jatyr. Bizdiń qazaqy bolmysymyzǵa saı kelmeıtin beınebaıandar kóbeıip ketti. Qandaı pikir bildiresiz?

— Men qazir Kámshatqa jáne sol sekildi qyzdarǵa aıaýshylyqpen qaraımyn, janym ashıdy. Uzaq ómir súrsin dep tileımin. Kúnderdiń kúninde olardyń balasy, nemeresi bolady. Bul beınebaıandar tasqa tańbalanǵandaı bolyp qaldy. Endi 20 jyldan keıin bala-shaǵasymen birge osy beınebaıandy kóre ala ma eken? Biraq taǵy bir oıym, eger osylaı oılaıtyn Kámshat bolsa, beınebaıanǵa túser me edi?! Múmkin prodıýsseriniń de isi shyǵar. Men Kámshatpen kezdesken kezde "osy beınebaıanǵa shyn máninde óz qalaýyńmen tústiń be? Álde prodıýsserińniń syzyp bergenin istep júrsiń be?" dep surar edim. Sulýlyqty, dene bitimniń myqtylyǵyn basqa jerde de kórsetýge bolady. О́zim jaqsy kóretin qaryndasym edi. Bilmeımin endi. 

— Biraq osyndaı beınebaıandar jıi kórsetilgendikten 10-20 jyldan keıin bul qalypty jaǵdaıǵa aınalyp ketpeı me? 

— Men talaı nárseni oılap júrmin. "Ulttyq ıdeologııamyzdan aıyrylyp bara jatqan joqpyz ba?" dep ózime jıi suraq qoıatyn edim. Biraq aınalamdaǵy ár salada jumys isteıtin dostarym, tanystarym bar. Mysaly, bazarda anaý-mynaý satyp, kún kórip júrgen adamǵa prezıdenttiń kim ekeni, elde qandaı ózgeris bolyp jatqany qyzyq emes. Ol bazarǵa baryp, tıyn-teben tapsam boldy dep kún kórip júr. Ár saladaǵy dostarymmen sóılesem, suhbattasamyn. Sosyn "qoǵam osylaı lastanyp kete bere me? Álde Alla Taǵala sheber ǵoı, ár nárseniń suraýy bolady ǵoı, munyń da suraýy bola ma" dep oılanam. Sóıtsem, ár nárseniń suraýy bolady eken. Sebebi, betinen áli uıat ketpegen, namysty jastar bar. Mán-maǵynasyz beınebaıandy kórsetip "osyǵan qalaı qaraısyń?" dep surasam, betinen oty shyǵyp, ashýǵa minetin jastar jeterlik. Mundaı jastar aýylda da, qalada da bar. Ultty saqtap qalatyn múmkindik joq dep aıta almaımyz. Tek memleket sál ǵana múmkindik berip, jaǵdaı jasasa bolar edi. Qazir memleket dinge baılanysty túrli sharalardy iske asyryp jatyr ǵoı. Ne úshin? Memleket dinnen qoryqqandyqtan nazar aýdaryp jatyr. Biraq ónerge qoryqqandyqtan emes, jany ashyǵandyqtan nazar aýdarý kerek dep oılaımyn.