Jambyldyq tiginshiniń isi ońǵa basyp tur

Jambyl oblysy Shý aýdanynda  kásipkerlikpen aınalysatyn turǵyndar jetip artylady. Keıingi jyldary bul salaǵa bet burǵandardyń arasynda názik jandylardyń úlesi artyp keledi desek artyq aıtpaǵanymyz. Solardyń biri – Shý aýdanynyń turǵyny Marjan Baımanasova. Onyń kásipkerlik salasynda júrgenine bıyl 10 jyl tolyp otyr.

Fabrıkada qarapaıym tiginshi bolǵan Baımanasova kásip ıesi bolýdy kishkentaıynan arman etken.  Búginde Shý qalasynda tigin sheberhanasyn ashyp, 10-nan asa adamdy jumyspen qamtyp otyrǵan jeke kásipkerdiń isi ońǵa basyp tur.

«Bala kezimnen ulttyq naqyshtaǵy kıimderdi tigýge qumartyp óstim. Tiginshilik qasıet anamnan daryǵan. Ol kisige ákesinen buıyrypty. Naǵashy atam kózi tirisinde óz qyzdaryna toı kóılekterin tigip, qutty oryndaryna qondyrǵan eken. Bala kezimde alǵash kıim tige bastaǵanymdy kórgen anam: «Osy qyz tiginshi bolady-aý» dep maǵan súısine qaraıdy eken. О́se kele, osy tigin salasynyń qyr-syryna qanyq bolý úshin 1989 jyly Taraz qalasyndaǵy «Sulý»fabrıkasynda tiginshi bolyp jumys istep, tájirıbe jınaqtaı bastadym. Keıinnen, táýekelge bel býyp, azdy-kópti tigin mashınalaryn alyp, az ǵana adammen óz kásibimdi bastap kettim», - deıdi kásipker.

Oblys ortalyǵy Taraz qalasyda týǵan M.Baımanasova Tarazdaǵy kásiptik tehnıkalyq kolledjdi tiginshi mamandyǵy boıynsha bitirgen. О́mirlik jaryn Shý óńirinen jolyqtyryp, otaý qurǵannan keıin de tiginshilikti tastamaǵan. Aýdandaǵy atelelerde jumys isteıtin tiginshilermen birge meıramhana, mektep jáne taǵy basqalarynyń perdelerin ásemdep, sándi etip tigýmen aınalysady. 2008 jyly óz kásibin qolǵa alǵan Marjan «Baımanasova» jeke kásipkerligin ashady. Alǵashynda shaǵyn ǵana bólmelerdi jalǵa alyp, kıim tigý, qysqartý, óńdeý syndy jumystardy atqarǵan. Keıin ulttyq úlgidegi kıimderi arnaıy tapsyryspen tige bastaǵan. Bul kásipti jańadan bastaǵanda nemistiń «Zinger» tigin mashınasymen jumys istese, qazir Baımanasovanyń sheberhanasy kúrdeli jumystardy ońaı atqara alatyn arnaıy tigin mashınalarymen jabdyqtalǵan. Qazir Marjan Baımanasovanyń turaqty tabys kózi – qazaqtyń toılary.

Baımanasovanyń aıtýynsha, alǵa qoıǵan jospary men maqsatary aýqymdy. «Armanym úlken tigin fabrıkasyn ashý», - deıdi ol. Aýdandaǵy kásipkerler palatasynan nesıe alýǵa múmkindik týyp jatsa, óndiris kólemin birneshe esege kóbeıtip, qol astyndaǵy jumysshy sanyn arttyrýdy da kózdep otyr.

Shapaǵat Qonysbaı