• USD 378.65
  • EUR 430.07
  • RUB 6
  • CNY 55.1
24 Tamyz, 07:00:25
Qoryqshylardyń materıaldyq-tehnıkalyq bazasy kúsheıtiledi

08 Maýsym, 2019 Aımaqtar

Áleýmettiń áleýetin arttyratyn áleýmettik dúken

Jambyl oblysynyń Shý aýdanynda «Aıaly alaqan» atty erekshe áleýmettik dúken ashyldy. Budan bulaı aýdandaǵy az qamtylǵan otbasylar úshin atalmysh dúkennen ózine qajetti azyq-túlik pen kerekti kıim-keshegin aqy tólemeı-aq alýǵa múmkindik týyp otyr. Dúkendi ashýdaǵy basty maqsat – turmysy tómen jáne áleýmettik az qamtylǵan otbasylarǵa qoldaý bildirý, kómek qolyn sozý.

Bul aýdanda búgingi kúnge deıin ashylyp otyrǵan ekinshi dúken ekenin de aıta ketýimiz kerek. Burnaǵy jyldary aýdandaǵy «Úmit úıi» qoǵamdyq birlestigi Tóle bı aýylynan dál osyndaı áleýmettik dúken ashqan bolatyn. Qazirgi kezde jumysyn bir júıege keltirip alǵan atalmysh dúkendi aýdan turǵyndary jaqsy biledi. Qaıyrymdylyq jasaýǵa nıettengen turǵyndar da osy dúkenge qaıyrylyp, hál-qadirinshe kómek qolyn sozyp kelgen. Endi mine,  40 myńǵa jýyq turǵyny bar Shý qalasynan «Aıaly alaqan» atty áleýmettik dúken ashylyp otyr. Ortalyq bazardaǵy «Dostyq» úıiniń ishinen ashylǵan dúkenge «Saýda-servıs» jaýapkershiligi shekteýli seriktestiginiń dırektory V.Lytkın qoldaý bildirip, dúkenniń turatyn ornyn tegin beripti. Sonymen birge, áleýmettik dúkenniń ashylýyna sebepshi bolǵan azamattarǵa aýdan ákimdigi men «Jastar resýrstyq ortalyǵy» qoldaý bildirgenin aıtý kerek.

«Qaıyrymdylyq jasasań, qaıyryn kóresiń» deıdi qazaq danalyǵy. Bul dúkendi ashqan azamat ta birneshe jyldan beri muqtaj jandarǵa qaıyrymdylyq jasap, áleýmettik ortada ár túrli deńgeıdegi otbasylardyń kem-ketigin jamap júrgen Erkin Túlebaev esimdi azamat. Muqtaj jandarǵa árdaıym kómek qolyn sozýdan shet qalmaıtyn ol birneshe jyldan beri aýdandaǵy «Eriktiler qozǵalysyna» jetekshilik etip keledi. «Qashanda kórshisin ash qaldyrmaǵan qazaq halqymyz «Elde bolsa, eringe tıedi» dep, jarty nan bolsa da bólip jeýge daıyn turǵan ǵoı. Bálkim, bul da bizdiń boıymyzdaǵy osyndaı izgiliktiń ushqyny bolar. Alaıda, biz ashyp otyrǵan áleýmettik dúkenniń artynda aty-jónin atamaýdy ótingen birqatar kásipker azamattar da bar. Kózge kórinbegenimen, kóp eńbek sol kisilerdiki», - deıdi ol óz sózinde.

Baıqaǵanymyzdaı, dúken ishindegi sórelerge sý jańa, ári sapasy joǵary aıaq-kıimder men túrli ólshemdegi kıim-keshekter qoıylypty. Bulardyń barlyǵyn aýdan kásipkerleri ákelip ótkizgen. Beısenbi men jeksenbi kúnderiniń aralyǵynda jumys isteıtin dúkennen kómekke zárý jandar óz keregin tegin ala alady. Budan bólek, atalǵan dúkende áleýmettik jaǵynan az qamtylǵan otbasylarǵa et, un, maı jáne qant syndy azyq-túlik túrleri de beriledi eken. Tipti, munda balalarǵa arnalǵan oıynshyqtar da bar. Tańdaý – ár adamnyń óz erkinde. Áleýmettik dúkenge alǵashqylardyń biri bolyp kelgen Shý qalasynyń turǵyny Gúlshat Smaılova bul kúndi asyǵa kútkenin aıtady.

Buǵan deıin atalmysh dúken ashylady degendi estigenbiz. Bul ásirese kópbalaly otbasylarǵa úlken qoldaý dep oılaımyn. О́zim segiz balanyń anasymyn. Búgingideı naryqtyq zamanda barlyǵynyń kıim-keshegin bútindep, azyq-túligin túgendeý ońaıǵa soqpaıtyny belgili. Al, jańadan ashylǵan «Aıaly alaqan» dúkeni aýdandaǵy kóptegen otbasylarǵa zor qýanysh syılaǵanyna senimdimin. Osy oraıda, kópbalaly otbasylarǵa qamqor bolyp, saýapty iske atsalysyp júrgen barlyq qaıyrymdy jandarǵa kópbalaly analardyń atynan óz rızashylyǵymdy bildirgim keledi, - deıdi ol. 

Aıta ketýimiz kerek, atalmysh dúkenge kez kelgen turǵyn ózi paıdalanbaıtyn, alaıda kııýge jaramdy kıim-keshekteri men balalar oıynshyǵyn jáne azyq-túlik pen turmystyq qajettilikke kerekti barlyq zattardy ótkizýine bolady.

Shapaǵat Qonysbaı

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir