• USD 468.56

  • EUR 497.56

  • RUB 7.3

  • CNY 67.18

29 Naýryz, 17:09:04
Almaty
+35°

Qazirgi tańda tirligin birlese, qaýymdasa otyryp tikteý - naryq talaby. Osy turǵyda aýyl turǵyndarynyń «bir jaǵadan bas, bir jeńnen qol shyǵaryp», óz usynystaryn erkin aıta alatyn, qabyldaǵanǵan sheshimdi qaýym bolyp atqarýǵa qumbyl kirise alatyn azamattardyń birigýi arqyly kooperatıv qurýdyń orny aıryqsha. Bul rette, Úkimet tarapynan kórsetiletin qoldaýdyń da az emes ekenin aıta ketý kerek. Máselen, atalǵan baǵyt boıynsha kooperatıvke birigemin degen sharýany nesıemen qamtamasyz etý syndy zor múmkindikter berilýde.  Oǵan Memleket basshysynyń bıylǵy jyldyń basty qujatynda kórsetilgen «Bes jyl ishinde 500 myńnan astam jeke úı sharýashylyqtary men shaǵyn fermerlerdi kooperatıvterge tartýǵa múmkindik beretin jaǵdaı jasaý kerek» degen sózi dáıek bola alady.

Burnaǵy jyldary Shý aýdanyndaǵy Qonaev aýylynda «Berekeli - 2016» kooperatıvi qurylǵan bolatyn. Kooperatıvti uıymdastyrǵan – buǵan deıin egin egip, mal ósirý arqyly jeke sharýa qojaǵylyǵyn dóńgeletip otyrǵan isker azamat Dinmuhammed Álimqojaev. О́tken jyldyń jeltoqsan aıynda qurylǵan kooperatıvtiń negizgi maqsaty – mal bordaqylaýmen aınalysyp, jalpy et óndirisin jolǵa qoıý. Qaı isti bolmasyn úıirip áketetin isker azamat Dinmuhammed shaǵyn sharýa qojalyǵyn keńeıtýdi birazdan beri oılap júrgen bolatyn. Alǵashynda ózine tıesili egistigine egin egip, qoldaǵy bar malyn baqqannan birqalypty tirshiligi dúrildep ketpesin túsingen bolýy kerek. Memleket tarapynan kooperatıv qurýǵa, aýylsharýashylyǵyna, onyń ishinde otandyq et óndirisin damytýǵa aıryqsha kóńil bólinip otyrǵany ony aýyl turǵyndarymen birlese jumys atqarýǵa ıtermelegen. Qazirgi tańda kooperatıv músheliginde 20 jeke qosalqy sharýashylyq bar. Olardyń árqaısysy Aýylsharýashylyǵyn qoldaý qory arqyly 6 paıyzben 4 mıllıon teńge kóleminde nesıe alǵan. Jalpy sany 20 adam 63 mln 900 myń teńge nesıe alyp, osy sharýashylyqtarda 336 iri qara mal bordaqylanýda. Kooperatıv músheleri atalǵan qarjydan maldy kútip-baptaýǵa arnalǵan jem-shóp qoryn jasaqtaýǵa 12 mıllıon teńge bólipti. Ázirge ishki naryq kóleminde jumys jasaýda. Dúnmuhamed Ádilhanhojaulynyń aıtýynsha, bir-eki jyldyń shamasynda mal basyn eki esege kóbeıtip, et óndiretin iri fabrıkalarmen birlese jumys jasamaqshy.

- Jeke sharýashylyqtar az ǵana malymen úlken fabrıkalarǵa nemese shet elderge et ótkize almaıdy. Osy oraıda, qolda bar iri qaranyń etin biriktire otyryp, etti keń kólemde ótkizýde kooperatıv qurý taptyrmaıtyn múmkindik bolyp tur. Osyny birden túsingen aýyl turǵyndarymen birlese otyryp jumys isteýdi qolǵa aldyq. Jýyq arada Soltústik Qazaqstannan et baǵytyndaǵy qazaqtyń aq bas iri qara malyn alyp kelýdi josparlap otyrmyz, - deıdi kooperatıv jetekshisi.

Ol úshin qazirden bastap birneshe fabrıkalarmen kelissózder júrgizip qoıǵan eken. Odan bólek, iri qarany etke ótkizý úshin «Berekeli-2016» kooperatıvi aýdandaǵy bazarlarmen de kelisimshart jasasqan. Memleket berip otyrǵan múmkindikti tıimdi paıdalanyp otyrǵan shýlyq sharýalar qazirdiń ózinde qora jaılaryn keńeıtip, mal basyn kóbeıtýge daıyndyq jumystaryn júrgizýde. Búgingi kúni sharýalardyń arasynda ózara erejeleri jasalanyp, onda jumys júrgizýdiń búkil júıesi qamtylyp otyr. Bordaqylanatyn iri qaranyń deniniń saýlyǵy men tazalyǵy tutynýshyǵa jetkenshe mamandardyń baqylaýynda bolady. Osyǵan oraı turǵyndar tutynatyn et sapaly bolý úshin maldyń babymen qatar, adal soıylýy da mańyzdy ekenin aıta ketken jón. Osyny eskergen «Berekeli-2016» kooperatıviniń músheleri Qonaev aýylynan mal soıatyn arnaıy oryn ashpaqshy. Alaıda, kooperatıv jetekshisi tıisti qujattardyń durys tirkelmegendiginen, mal soıý alańyn ashýda birqatar máseleler týyndap jatqan aıtady. Dese de, bul másele aldaǵy ýaqytta óz sheshimin taýyp, mal soıý ornynyń qurylysyn qolǵa alatyndaryn  jetkizdi.

Birlese otyryp jumys isteý kólemdi, ári tıimdi. Memleket arqyly qarjylandyrý ońtaıly jáne júıeli bolý úshin birigý - búgingi tańdaǵy úlken qajettiliktiń biri. Úlken sharýashylyq kólemdi jumys tyndyratynyn da esten shyǵarmaǵan abzal. Kooperatıvke birikken tusta sharýa qojalyqtarynyń derbestigi ózinde qalady, malyna, jerine, esep shotyna, úıine, qorasyna  eshkim soqtyqpaıdy. Búginde sharýalardyń basty qaýpi osy ǵana. Biriger aldyndaǵy basqosýlarda basyn ashyp alatyn nárse de osy. Kooperatıvter agrarlyq nesıelerdi, mal sharýashylyǵy ónimderine, mal azyǵyn daıyndaýǵa beriletin sýbsıdııalardy ońaı alady. Rasynda, aýyl sharýashylyǵy jumysynda shyńdalǵan, esepti de biletin kadrlardyń qajettiligi, olardyń basyn qosa bilse, elge paıdaly sharýalarmen shuǵyldaný múmkindigi artary sózsiz. Mine, osynyń barlyǵyn eskerip, alaqandaı aýyldaǵy isker azamattardyń basyn qosý arqyly kooperatıv qurǵan Dúnmuhammed Álimqojaev óziniń ǵana emes, birneshe sharýa qojalyqtyń sharýasyn shalqytyp otyr.

Shapaǵat Qonysbaı

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir