Reseı Qazaqstanǵa ne sebepti qarý-jaraq tasymaldap jatyr?

Áskerı sholýshy Aleksandr Hrolenko Reseıdiń Qazaqstanǵa qandaı qarý-jaraq tasymaldaıtyny týraly aıtyp berdi dep habarlaıdy Qamshy.kz aqparat agenttigi. 

Stokgolm halyqaralyq álemdik máselelerdi zertteý ınstıtýtynyń (SIPRI) baıandamasyna súıensek, Reseıdiń qorǵanys ónimderi saýdaǵa túsetin iri naryqtar – Úndistan (27%) jáne Qytaı (14%), al postkeńestik keńistikte – Ázerbaıjan, Belarýs jáne Qazaqstan.

"Vertolety Rossıı" holdıngi jyl basynda "Qazaqstan ınjınırıng" kompanııasy jáne №405 avıasııalyq jóndeý zaýytymen birge kelisimshart jasasyp, soǵan sáıkes Qazaqstanda Mı-8AMT jáne Mı-171 tikushaqtary qurastyrylatyn boldy. Reseılik tikushaqtardyń myqty sapasy men beriktigi búkil álemge áıgili. Qazaqstanda Reseıdiń 200-ge tarta áskerı jáne azamattyq tikushaqtary qoldanylyp júr.

Sonymen qatar Qazaqstan aýmaǵynda Il-103M jańartylǵan kópmaqsatty jeńil ushaǵynyń óndirisi qolǵa alynbaq. Tıisti kelisimge S.V. Ilıýshın atyndaǵy avıasııa kesheni men qazaqstandyq avıasııa zaýyty qol qoıdy. Birlesken kásiporyn 2019 jyly iske kirisedi, al 2022 jyldan bastap ónim tasymaldanady.

Keńes Odaǵy ydyraǵannan keıin Qazaqstannyń qorǵanys ónerkásibi keshenine 196 kásiporyn muraǵa qaldy. Munda keńestik torpedalar, zymyrandar, zymyranǵa qarsy qorǵanys júıeleri, tankterge qarýlandyrý, barlaý júıeleri, radıoelektrondy qurylǵylar, artıllerııalyq júıeler men jaıaý áskerdiń jaýyngerlik kólikteri shyǵarylatyn. Qazirde Reseı men Qazaqstannyń áskerı-tehnıkalyq yntymaqtastyǵy qarý-jaraq tasmyldaýshylaryn ártaraptandyrý saıasatyna qaramastan strategııalyq seriktestikke aınaldy.

Reseı men Qazaqstan arasyndaǵy jyldyq taýar aınalymy 18 mıllıard dollarǵa jetip otyr. Áskerı ónimderdiń ózara tasymaly, qarý-jaraq pen áskerı tehnıkaǵa qyzmet kórsetý jáne jóndeý, birlesken ǵylymı-zertteý jáne tájirıbelik jumystar, birlesken qorǵanys ónerkásibi kesheni kásiporyndary, áskerı jáne áskerı-tehnıkalyq kadrdy daıyndaý sharalary týraly belgili bolǵanymen, jalpy alǵanda Reseı men Qazaqstan arasyndaǵy áskerı-tehnıkalyq yntymaqtastyqtyń qarjy máselesi qupııa bolyp sanalady.