Murat Ábenov: Keńestiń jumysy saıası máselelermen ǵana shektelmeýi kerek

Qoǵam qaıratkeri Murat Ábenov ortalyq kommýnıkasııalar ortalyǵynda ótken brfıng barysynda "Ulttyq qoǵamdyq keńestiń jumysy saıası máselelermen ǵana shektelmeý kerek" degen pikirin aıtty dep jazady Qamshy.kz aqparat agenttigi. 

"Keńestiń qurylýynyń qajettigin bárimiz túsinip otyrmyz. Jańa ǵana keńestiń quramyn qarap shyqtym. Maǵan ár túrli saladan, ár túrli saıası partııalardan ókilder bar bolǵany unady. Meniń oıymsha, bul uıym anda-sanda, 2-3 aıda bir ret resmı jıyn ótkizetin resmı joldan tartynyp, qoǵamdaǵy eń ózekti máselelerdi talqylaıtyn alań bolýy kerek. Keńestiń jumys tóńireginde tek qana saıası máseleler emes, áleýmettik máseleler de talqylanatyny unady. Bul bizge memlekettik baǵdarlamalardy saraptap, taldap, usynys berip, kemshilikter bolsa birden aıtyp, problemanyń ýshyǵyp, kúsheıip ketýine jol bermeı, der kezinde durys usynystar jasaýǵa múmkindik beredi", - dedi qoǵam qaıratkeri.

Ábenovtyń aıtýynsha, "belsendi azamattardyń oı-pikiri memlekettik organdar tarapynan eskerilmeı,  qazir kóptegen ózekti máseleler tek áleýmettik jelide ǵana aıtylyp qana qoıady".

"Qazir bizdiń azamattar óte belsendi. Biraq, ókinishke oraı, memlekettiń organdarynyń basshylarymen tikeleı baılanys jasaýǵa kóbiniń múmkindigi joq. Keıbir mınıstrlik ashyq, jarııaly túrde jumys istese, keıbir memlekettik organdardyń basshylary jabyq jumys júrgizedi. Meniń oıymsha, keńes músheleri el aldyndaǵy jaýapkershiligin túsine otyryp, osy keńestiń ókilettiligin paıdalanyp, óz salalary boıynsha kóptegen kúrdeli máselelerdiń tıimdi sheshilýine atsalysýy kerek.

Kóp azamattar máselelerin qaıda aıtaryn bilmeı, áleýmettik jelimen shektelip júrgen edi. Memlekettik baǵdarlamalardyń tıimsizdigin memleket basshysy da synady. Kóbinese baǵdarlamalardy talqylaý jabyq túrde, mınıstrlik janynda ǵana ótedi. Sondyqtan, oǵan qatysty syn áleýmettik jeli deńeıinde ǵana qalyp keldi. Qoǵamdyq keńesterdiń jumysynda bul qarastyrylǵanymen, olardyń mınıstrlik janynan qurylǵanyn umytpaý kerek. Bul keńes tek máselelerdi talqylap qana qoımaı, eldegi pikirtalasty taldaıtyn bolady", -dedi Ábenov.

Qoǵam qaıratkeri Murat Ábenov búgin Qazaqstan prezıdenti Qasym-Jomart Toqaev bekitken  Ulttyq qoǵamdyq senim keńesiniń quramynda bar.