"Arman arqalap ketken qarakózderdiń tabyty oraldy": Sheteldegi qazaq qyzdarynyń jumbaq ólimi

Qazaq qyzy qaıtys boldy. Jumbaq jaǵdaıda... Osyndaı mátinmen beriletin jańalyqtar sońǵy jyldary kóbeıip ketti. Sondaı-aq belgisiz jaǵdaıda qaıtys bolǵandardyń barlyǵy derlik shetelde bilim alyp jatqan qazaq qyzdary. Qamshy.kz aqparat agenttiginiń tilshisi ózge elde jumbaq jaǵdaıda qaıtys bolǵan qazaq qyzdarynyń tizimin jasap, oqyrman nazaryna usynýdy jón kórdi. 

Tomırıs Baısafa

2018 jyldyń sáýir aıynda Tomırıs Baısafa Máskeý memlekettik halyqaralyq qatynastar ınstıtýtynyń 4-qabatyndaǵy dárishananyń terezesinen qulap ketken.

1997 jylǵy Tomırıs tańǵy 4.00-te qaıtys boldy. Tergeýshiler sáýirde  atalmysh iske qatysty qylmystyq is qozǵaǵan. Tergeýshilerdiń málimetinshe, qyz birden aýrýhanaǵa jetkizilgen. Qaıǵyly oqıǵa 13 sáýirde boldy.

Tomırıs halyqaralyq ekonomıkalyq qatynastar kafedrasynyń 4- kýrsynda oqyǵan. Ol úzilis kezinde terezeden qulap ketken. Beıresmı aqparatqa sáıkes, Tomırısti Mýrtýzalı Medjıdov atty jigit ıterip jibergen. 

Týystary men dostary da qyzdy bireýdiń ıterip jibergenine senimdi. Ázirge kúdikti retinde Tomırıstiń daǵystandyq dosy Magomed Kotıev tanyldy. Reseılik BAQ-tyń deregine súıensek, Tomırıs pen daǵystandyq azamattyń ursysyp turǵan sátin kórgen kýágerler bar. Derek qyz ben jigittiń arasynda dostyqtan da jaqyn qarym-qatynastyń bolǵanyn keltirdi. Alaıda Magomed Kotıev bolǵan oqıǵaǵa qatysy joq ekenin aıtty. Jigittiń aıtýynsha, Tomırıs ekeýi aralaspaıdy, tipti tanyǵan da emes.

Tomırıs Baısafanyń ákesi jigittiń bedeldi otbasynan shyqqanyna senimdi. Bul týraly ákesine Máskeý tergeý bóliminiń qyzmetkerleri aıtyp qalǵan.

Eldana Qaharman

Bıylǵy jyldyń naýryzynda Túrkııada oqý men jumysyn qatar alyp júrgen belsendi qazaq qyzy jumbaq jaǵdaıda qaıtys boldy. 

Fyrat ýnıversıtetiniń ekinshi kýrs stýdenti Eldana Qaharmanmen baılanysa almaǵan dostary Iyldyzbaýlary aýdanyndaǵy úıine barǵan.

Esikti temir ustasyna ashqyzǵan dostary Eldanany as bólmesinde qımylsyz jatqan kúıde tapqan. Aldyn ala boljam boıynsha stýdent ózine-ózi qol salǵan bolýy múmkin. 

Biraq onyń áriptesteri Eldananyń sýısıd jasaǵanyna senbeıdi. 

Eldana Qaharmannyń jansyz denesin Fyrat ýnıversıteti aýrýhanasynyń máıithanasyna jetkizilgen.

Elazyk polıseıleri oqıǵaǵa qatysty tergeý amaldaryn bastaǵan.

Bloger qazaq qyzy Túrkııanyń Kanal 23 arnasynda tilshi bolyp qosymsha jumys istep júrgen eken.  

"Biz óz telearnamyzdyń qojaıynyn joǵaltqandaı bolyp otyrmyz. Eldana únemi kúlip júretin, aınalasyn da kúldiretin energııaǵa baı ári túsinigi mol qyz edi. Ata-anasy men týǵan týystaryna qaıǵyra kóńil aıtamyz", dep jazǵan telearna jýrnalısteri. 

Sandıra Serikhan

Qytaıda bilim alyp jatqan 24 jastaǵy boıjetken 17 qabattan qulap, jumbaq jaǵdaıda qaıtys bolǵan. Sumdyq oqıǵa bıylǵy jyldyń 26 sáýirinde bolǵan. Jergilikti polıseıler isti sýısıd dep jyly jaýyp qoıǵan. 

Al ata-anasy qyzynyń óz-ózine qol salǵanyna senbeı otyr. Sebebi qaıǵyly oqıǵadan bir kún buryn Sandıramen vıdeo arqyly sóılesken. Sandıra demalysta elge qaıtamyn dep, óziniń alǵan syılyqtaryn kórsetipti. 

Qaıǵyly oqıǵa bolǵan kúni Sandırany Baıan esimdi qurbysy klýbqa barýǵa kóndirgen. Keıin Danııar, Madııar esimdi jigittermen tanystyrypty. Birazdan soń Danııar "úıimde bir zatym qalyp qoıdy" degen jeleýmen "Sandırany úıine birge baryp keleıik" dep ótinish jasaǵan. Birazdan soń Sandıra páterden jylap shyǵady. Al Shymkenttiń týmasy Danııar bolsa, ne úshin jylaǵanyn da túsindirip bere almaǵan.  Odan qaldy, qyzdyń bir aıaq kıimi terezeniń tusynda qalyp qoıǵan.  Jaqtaýdan saýsaq izderi tabylmaǵan. Sol sebepti de ony bireýdiń laqtyryp jibergenine senimdi.

Úsh túrli taǵdyr. Bir ǵana uqsastyq bar: ómirge qushtar órimdeı jas qyzdardyń ólimi jumbaq. "Úsh qyz da óz-ózine qol jumsady" dep boljam jasaldy. Degenmen týystary men janynda júrgender buǵan senbeıdi. Týǵan-týystary ádildik izder sharq ursa, naǵyz qylmyskerler bostandyqta taırańdap júr. Biraq ózimizdegi zańdy túzeı almaı, ózge eldiń zańyna qalaı ýáj aıtamyz?! Jaı ǵana ishteı qylmysker jazalanar, ádildik ornaıdy dep qana tileımiz. Úmit etemiz...