"Chernobyl" serıalyn kórgen aqtóbelik óz-ózine qol jumsady. Nege?

Aǵymdaǵy jyldyń 15-maýsymynda Aqtóbe turǵyny Naǵashybaı Júsipov «Chernobyl» serıalyn kórgennen keıin óz-ózine qol jumsady. Onyń denesin 5 qabatty úıdiń ústinen qulaǵannan keıin óli kúıinde tapqan dep jazady Qamshy.kz aqparat agenttigi.

Naǵashybaı Júsipov – 1986 jyly Chernobyl jarylysyn apatyn zalalsyzdandyrýǵa jumys jasaǵan azamat. Keńes Odaǵy qulaǵannan keıin kóptegen postkeńestik elder Chernobyl ardagerlerine qyzmeti úshin dep páter bergen. Al Naǵashybaı óz qyzmeti úshin berilýi tıis páterge qol jetkize almaı, ómiriniń sońyna deıin bes balasymen jáne áıelimen jataqhanada turyp kelgen.

Ol óziniń jumysyna berilgen azamat edi. 10 jyl boıy páter kezeginde turǵan ol óziniń aty tizimnen óshirilgenin kórgende qatty qapalanypty. Chernobyl jarylysy kezinde qyzmet jasaǵannan keıin onyń densaýlyǵy kúrt nasharlap, aýrýhana tósegine jıi tańylatyn bolǵan.

Aıǵa jýyq ýaqyt buryn Naǵashybaı Júsipov "Aqtóbe Taıms" aqparat quralyna suhbat beripti.

"Bizdi ne úshin shaqyryp jatqanyn eshkim aıtqan joq. Ol kezde traktor aıdaıtyn edim. Chernobyl apatynan keıin densaýlyq nasharlap ketti. Men odan keıin Semeıde de qyzmet jasadym. Keıde kóshede júrip kele jatyp qulap qalatyn kezder bolady. Janymda áıelim júretini qandaı jaqsy", - deıdi ol suhbatynda.

"Men ony tanıtynmyn jáne óz-ózine qol jumsaǵany týraly da estidim. Naǵashybaı zapastaǵy áskerdiń biri edi. Chernobyl apatyn zalalsyzdandyrýǵa birinshi bop attandy jáne eń qaýipti tórtinshi blokta jumys jasady. 1997 jyly oǵan jataqhanadan bólme berdi. Sol jerde áıelimen jáne kishkentaılarymen birge turyp jatqan. Balalary óskennen keıin ol jataqhanadaǵy bólmesiniń ornyna páter berýdi surady. Páterge 10 jyl boıy kezekte turdy. Keıin ol tizimnen syzylǵany belgili boldy. Men ony sońǵy kórgende óz degenine jete almaǵan sharshańqy kúıde edi. Onyń bıikten sekirip ketkeni de sol páter máselesinen boldy dep oılaımyn. Qazir aımaqta 244 zalalsyzdandyrýshy turady. Barlyǵymyz apattan keıingi múgedektermiz. Kezinde bizdiń sanymyz 2 myńǵa jýyq edi. Qazirdiń ózinde jeke páteri joq 20 shaqty ardager bar. Men bul máseleni ákimshilik aldynda kóteremin. Naǵashybaıdyń áıeli úı alýy tıis", - dedi "Aqtóbe oblystyq Chernobyl múgedekteri" qoǵamdyq birlestiginiń tóraǵasy Baqytjan Satov