Atyraý polıseılerin sýdan qutqaratyn jańa quraldarmen jabdyqtady

Atyraý polıseıleri zardap shekkenderge alǵashqy kómek kórsetýge arnalǵan sheberlik synyptarynan tájirıbe jınaqtap keledi dep jazady Qamshy.kz aqparat agenttigi.

Oblystyń tótenshe jaǵdaılar departamentiniń sýdan qutqarý qyzmeti men jedel járdem
stansasynyń feldsherleri sýǵa batqan adamdy qutqarý kezinde kórsetiletin áreketterdi nazarǵa usyndy.

Sheberlik saǵaty polısııa serjanty Shalqar Aqymǵalıevtyń sýdan adam qutqarý kezinde qaza bolǵan jeri - Jaıyq jaǵasynda ótti. Áriptesterin únsizdikpen eske alǵan otyzdan astam patrýldik polısııa qyzmetkerleri Jaıyq jaǵasyna bet aldy. Jedel járdem stansasynyń feldsherleri zardap shekken adamnyń ómirin qalypqa keltirý jáne saqtap qalýǵa baǵyttalǵan is-áreketterin kórsetti. Polısııa qyzmetkerleri 2 jasandy deneniń kómegimen adamnyń tynys alý júıesin qalypqa keltirý jáne júrektiń syrtynan massaj jasaý qımyldaryn úırendi.

Sonymen qatar, TJD sýdan qutqarý qyzmetkerleri arqan jáne qutqarý beldemshesin durys qoldaný erejelerin kórsetti. "Jaǵalaýdy jaıaý patrýldeý kezinde kúnine 5 shaqyrymnan astam jerdi júrip ótemin. Qazir sýǵa shomylý kezeńi bastaldy, oǵan qosa "jabaıy jaǵajaıdyń" kóbeıip turǵan kezi. Biz kez kelgen oqys oqıǵa kezinde daıyn bolýymyz qajet. Búgin kóp nárseni úırendim",- dep óz áserimen bólisti jaıaý patrýldiń qyzmet ınspektory polısııa leıtenanty Aıbar Ersaıynov.

Al, patrýldik polısııa ınspektory polısııa leıtenanty Aıbolat Ýteshqalıevtyń sýdan adam qutqarýda tájirıbesi bar. Byltyr jaz mezgilinde sýǵa batqan jas jetkinshekti aman-esen qutqaryp shyqqan bolatyn.
"Olar ekeý bolatyn. О́zende júzip júrgende aıaqtary qurysyp qalǵan bolýy kerek, kómekke
shaqyryp aıqaılaı bastady. Sýdyń ortasyna deıin júzip baryp, kómekke umtyldym, alaıda tek bireýin ǵana qutqara aldym",- dep oqıǵany esine aldy Aıbolat. Sonymen qatar, patrýldik polısııany qajetti qutqarý quraldarymen jabdyqtaýdy kúsheıtý zardap shekkenderdi qutqarý kezindegi jumysty jeńildetinin atap ótti.

Sheberlik saǵatynyń sońynda patrýldik polısııa ekıpajdaryna jańadan 10 sýdan qutqarý
quraldary berildi.