Nurlan Noǵaev: Sizderge úlken jaýapkershilik júktelip otyr

Oblys turǵyndarynyń kómek-qoldaýynyń arqasynda qazir Arysta 482 úıdi qalpyna keltirý jumystary júrip jatyr dep habarlaıdy Qamshy.kz aqparat agenttigi Atyraý oblysynyń óńirlik kommýnıkasııalar qyzmetine silteme jasap.

Qazirgi mezette Atyraý oblysyna bólingen sektorda 13 qurylys mekemesi qyzmet etýde, 500-den astam adam jáne 20-ǵa jýyq birlik tehnıka tartylǵan. Quramynda oblys ákiminiń orynbasary men keńesshileri bar vedomstvoaralyq top osy jumystardy úılestirip otyr. Qazir jumystar tolyqqandy rejımde júrgizilýde, birneshe úı tolyqtaı qalpyna keltirildi.

Bul jóninde Atyraý oblysynyń ákimi Nurlan Noǵaev Arysqa jumys saparymen kelgen premer-mınıstr Asqar Mamınge baıandady. Sodan soń, oblys ákimi merdiger uıymdardyń basshylarymen keńes ótkizdi.

"Osynda oryn alǵan oqıǵa búkil elimizge aýyr soqqy boldy. Qazaqstannyń túkpir-túkpirinen adamdar Arystyń turǵyndaryna kóńil bildirip, túrli kómek kórsetip jatyr. Úılerdi qalpyna keltirý jumystary sapaly júrgizilip, ýaqtyly aıaqtalýy tıis. Sizderge úlken jaýapkershilik júktelip otyr. Úılerdi salǵanda kirgen adamdar rıza bolyp, sizderdi jyly sezimmen eske alatyndaı qylyp isteńizder",- dedi Nurlan Noǵaev.

О́ńir basshysy keńesten soń Arystyń turǵyndarymen kezdesip, tilekterin tyńdady.

"Oblystyń turǵyndary Memleket Basshysynyń úndeýin qoldap, Arysty qalpyna keltirýge belsendi atsalysýda. Gýmanıtarlyq kómek, qarajat jiberildi, eriktiler bardy. Bul bala kezimizden qanymyzǵa sińgen qasıet, qıyn-qystaý sátte elimizdiń turǵyndary otandastaryn qoldaýsyz qaldyrmaıdy",- dep atap ótti oblys ákimi.

О́z kezeginde, Arystyń turǵyndary qoldaý kórsetkeni úshin atyraýlyqtarǵa rızashylyǵyn bildirdi.

"Biz barlyǵyna da, Elbasyna, Prezıdentke, Atyraý oblysynyń turǵyndaryna zor rahmet aıtamyz. Sapaly, jaqsy úılerdiń qarqyndy salynyp jatqanyn kórip otyrmyz. Syn sátte shetkeri qalmaı, qoldaý kórsetkenderińizge rahmet. Úılerimiz bitkesin Atyraý oblysynyń turǵyndaryn qýana-qýana shaqyramyz. Sizder umytylmastaı bolyp esimizde qalasyzdar",- dedi Arystyń turǵyny Bıbihadısha Momyn.