Arystaǵy sherýde "saqaldylar" kimdi sabady?

Buǵan deıin Almatyda qyzdardy aqshaǵa sheshindirgen bloger Aıjan Baızaqovanyń klýbyn órteımiz dep bir top saqaldy jınalyp, shý shyǵarǵan bolatyn. Bloger ári zańger Aıgúl Orynbek Shymkenttegi arystyqtardyń mıtıngisinde jýrnalısterdi saqaldylar sabaǵanyn aıtady. Bul týraly ol SN.kz aqparattyq portalyna bergen suhbatynda aıtty dep jazady Qamshy.kz aqparat agenttigi.

Onyń aıtýynsha, mıtıngide tapsyrmamen kelip, halyqty qylmysqa úgittep júrgen arnaıy top bar. 

"25 maýsym kúni "Vlast.kz" jýrnalısterin uryp, kameralaryn syndyrdy. Men de sol jerde bolǵanmyn. Tikeleı efır júrgizip jatqan kezimde "bul «Habar" arnasynyń tilshisi, bıliktiń adamy" dep maǵan da qol kótergen", – dep bastady sózin zańger.

Aıgúl Orynbek óziniń Arys qalasynyń turǵyny ekenin, alaıda narazylyqty bastap júrgenderdiń arasynda arystyqtardyń óte az ekenin jetkizdi. 

"Arystyqtar óte az. Sosyn urǵandardy sońyna deıin baqyladym. Olar memlekettik nómiri 02 (Almaty) degen kólikke minip ketti. 

Jalpy olar meshit janynda 25 maýsymnan bastap úgit-nasıhat júrgizgen. 27-si kúni arystyqtar osylardyń aıdap salýymen, ashý-yzamen narazylyqqa shyqty",  – deıdi bloger. 

Dinı aǵymdar jaıly jıi másele kóteretin bloger úgitshiler dep ataǵan adamdardyń betperdesi áli ashylmaǵanyn aıtady. 

"Elorda bolsyn, Arystaǵy bolsyn, barlyǵynda saqaldylar júr ǵoı. 6-sy kúni Shymkentte ótken mıtıngide meniń telefonymdy syndyrǵan saqaldy jigitterdi ustapty",  – deıdi ol. 

Qazir kúdiktige qatysty tergeý júrgizilip jatyr eken.