Almatyda polısııa júzden asa adamdy ustady (vıdeo)

Almatyda 6 shilde keshki 19.00-den bastap polısııa Balýan Sholaq sport kesheniniń mańynda júrgen 100-den asa adamdy ustady dep jazady Qamshy.kz aqparat agenttigi. 

Oqıǵa ornyna arnaıy barǵan Qamshy tilshisi polısııanyń adamdardy eshqandaı sebepsiz ustaǵanyn kórgen.  Polısııa ókilderi aldymen tek er adamdardy ustady. Sosyn sol mańda júrgen barlyq adamdardy jappaı arnaıy polısııa kólikterine kúshpen kirgizip alyp ketti. Adamdar polısııa ustaǵannan keıin "Shal ket!", "Alǵa, Qazaqstan!", "Oıan, Qazaqstan!" "Shaldyń quldary jiberińder!"  dep aıǵaılady. Polısııa ustaǵandardyń arasynda egde jastaǵy áıel adamdar da bar.

Almatydan bólek dál osy kúni Nur-Sultan, Shymket qalalarynda da adamdardy ustaǵan. 

Qazaqstanda tıym salynǵan "Qazaqstannyń demokratııalyq tańdaýy" qozǵalysynyń jetekshisi, Eýropada turyp jatqan eks-bankır Muhtar Áblıazov buǵan deıin áleýmettik jeliler arqyly 6 shilde Qazaqstan halqyn qazirgi bılikke qarsy narazylyqqa shyǵýǵa shaqyrǵan.