Tuńǵyshbaı Jamanqulov: Men qazir shartty túrde túrmedemin (vıdeo)

Akter, rejısser, teatr pedagogy, ónertaný ǵylymdarynyń kandıdaty, professor, elimizdiń halyq ártisi, Qazaqstan Memlekettik syılyǵynyń laýreaty, Jambyl oblysynyń qurmetti azamaty, "Parasat" jáne "Dostyq" ordenderiniń ıegeri Tuńǵyshbaı Qadyruly Jamanqulov Youtube jelisinegi "Ýaqyt kórsetedi" arasyna suhbat berdi dep jazady Qamshy.kz aqparat agenttigi. 

Ýaqyt tapshy zamanda ýaqyt taýyp, "Ýaqyt kórsetedi" baǵdarlamasyna suhbat bergen Tuńǵyshbaı myrza óziniń kıno álemine esiktiń jabyq ekenin aıtty. О́zine qoıylǵan suraqqa akter:

"Jasyqtyq, onyń arty – pasyqtyq. Adam bolǵan soń ózimizge tán kemshilikter bar. Bir mánisi bolar degen ýaqyt kónbeıtin dúnıege qazaq úırenip qalǵan. "Bastan kelse – óldik, arttan kelse – kóndik" degen de qazaqtyń eń soraqy maqaly. Men túgili úıdegi jeńgeń de kınoǵa túspeıdi qazir.",- dedi.

Ár sózin naqtylap otyrǵan pedagog ózin baǵalamaı júrgenderge renjimeıtinin aıtty.

"Men ólgende tasymdy súımese de , "oıbaı, obal boldy ǵoı" deıdi de, ary qaraı umytyp júre beredi. Keshegi qadirimizdi qashyryp almaıyq. Basymyzǵa túskende ǵana solaı edi, dep oılanamyz. О́kinishten týyndaǵan saǵynyshtyń ne keregi bar.

Mahambettiń aıtatyny bar:

Tirligimde syılaspaǵan aǵaıyn,

Men ólgen soń jylasań,

Qum quıylsyn kózińe."

Qaýzalmaı ketken keıbir suraqtardy júrgizýshi qaıtadan jaryqqa shyǵaryp, rejısserdiń mereıtoıy jaıly qoıylǵan suraqqa:

"Meniń meretoıym toılanǵan joq desem de bolady. Qazirgi prezıdent Q.Toqaev, senator D.Nazarbaev, B.Saparbaev óz telegramdaryn jiberdi. Talaı batyrdy halyqqa tanystyrǵanymdy eskerip toılamasa, zorlap toılata almaımyn. Basqaryp otyrǵan basshy jigitter, kóleńkesinen qoryqty.",- dep jaýap berdi.

Suhbat barysynda biraz nárse aıtyldy. Sóz arasynda:

"Qazirgi tańdaǵy "avtorıtet" degen uǵym múldem basqa. Qazir ulttyń ózi, halyqtyń ózi "avtorıtet". 90-jyldardaǵy "avtorıtet" uǵymy qazir joq",- deıdi aǵamyz.

О́ziniń abyroıyna qatysty, el ishinde bolyp jatqan másele qatysty suraqqa:

"Men qazir shartty túrde túrmedemin. Maǵan qyzyl jaǵaly baýyrlarym:

"Aǵa, adam kóp jınalǵan jerge barmańyzshy, toıǵa kóp bara bermeńiz. Sizdi "jaqsy kóretin" jandaryńyz bizge ýáj aıtady",- dep jalynǵandaı bolady. Men ónerpaz adammyn. О́ner - meniń ómirim"

"Qazirgi ónerde júrgen qyzdarǵa óte qıyn. Burynǵydaı eshkim ónerdi baǵalap jatqan joq. Ol kezde ǵashyq bolǵan jigitter, sol qyzdy jar qylyp alatyn. Qazir qyzdar qurbandyqqa baryp jatady. Olar – túndik qurbandar. Jetistikke jetkeni bar, jetpegeni bar ishinde",- deıdi Tuńǵyshbaı aǵa.

Saqaldylar men oranǵandarǵa nazyn bildirgen el aǵasy:

"Biraz adam "popýlızm" úshin júr",- dep aıtty.

Suraqtarǵa salmaqty jaýap bergen Tuńǵyshbaı Jamanqulov sátti suhbat bolǵanyn jasyrmady.