"Janyń ashysa, janyma kel!": Aqyn Ásııa Berkenova Qostanaıdaǵy qazaq mektebine baılanysty úndeý jarııalady

Aqyn Ásııa Berkenova qazaq mektepteri jabylaıyn dep jatyr degen shýly aqparatqa qatysty usynys joldap, ótinish bildirdi dep habarlaıdy Qamshy.kz aqparat agenttigi tobolinfo.kz saıtyna silteme jasap. 

Qostanaı qalasynyń ortalyǵyndaǵy №24a bastaýysh mektebiniń tóńiregindegi daý-damaı taýsylar emes. Esterińizde bolsa, osydan bir apta buryn 24a bastaýysh mektebi Borodın kóshesinde ornalasqan burynǵy kásibı-tehnıkalyq kolledjdiń ǵımaratyna kóshiriledi degendi estip, ata-analar narazylyq bildirgen bolatyn. Olar qala ákimi Qaırat Ahmetovpen kezdesip, oblys ákimi men prezıdent Qasym-Jomart Toqaevtyń atyna petısııa jazdy.

Al osy jaǵdaıdan keıin  «Qostanaı qalasyndaǵy jalǵyz mektep jabylǵaly jatyr»  degen aqparat taraǵan bolatyn. Osy jaǵdaıdy ishten bilip, basy-qasynda júrgen áıgili aıtysker aqyn Ásııa Berkenova el azamattaryn sabyrǵa, osy jáıttiń aqıqatyn birge izdeýge shaqyrdy. Sonymen qatar, qaladaǵy 6 qazaq mektebi men bıyl ashylǵaly jatqan 7- qazaq tilindegi mekteptiń ǵımaratyn aralap, bar shyndyqqa birge kóz jetkizýdi usyndy.

"Eldiń jaǵdaıyna janyń ashyp, sonyń ras-ótirigine, aqıqatyna kóz jetkizgińiz kelse, elimizge kelip qaladaǵy alty mektepti, ashylaıyn dep jatqan jetinshi mekteptiń ǵımaratymen tanys bolýdy usynar edim.  Eshkimge bolysyp, bılikke bas uraıyn dep jatqanym joq. Degenmen de árkim óziniń kórgisi keletinin kóredi, izdegenin kóredi", - dedi Ásııa Berkenova.