• USD 468.56

  • EUR 497.56

  • RUB 7.3

  • CNY 67.18

29 Naýryz, 13:37:37
Almaty
+35°

02 Shilde, 2019 Shyǵys Qazaqstan oblysy

Zaısanda altybaqan teýip, aqsúıek oınady

Shyǵys Qazaqstan oblysynyń Zaısan aýdanynda «Dombyra – dastan» atty merekelik konsert pen «Altybaqan» oıyn-saýyq keshi ótti

Shyǵys Qazaqstan oblysynyń Zaısan aýdanynda «Dombyra – dastan» atty merekelik konsert pen «Altybaqan» oıyn-saýyq keshi ótti. «Rýhanı jańǵyrý» baǵdarlamasy aıasynda qolǵa alynǵan bul merekelik shara «Ulttyq dombyra» kúnine oraı uıymdastyryldy dep habarlaıdy Qamshy.kz aqparat agenttigi. 

Esterińizde bolsa, shilde aıynyń alǵashqy jeksenbisi elimizde «Ulttyq dombyra» kúni retinde belgilengen bolatyn. Sodan beri respýblıka kóleminde dombyra kúni toılanyp keledi. Igi dástúr Zaısanda bıyl da óz jalǵasyn tapty. 

«Abaı» saıabaǵynda shymyldyǵy túrilgen merekelik sharada ulttyq ónerimizdiń mereıi tasyp, mártebesi asqaqtady. Jınalǵan jurt ult aspaptar orkestriniń súıemeldeýimen kúmbirlegen kúı men áýelegen án tyńdap, ulttyq kıim kıgen qyzdardyń myń burala bılegen bıin súısine tamashalady. Bul kúni qazaqtyń qara dombyrasyna yqylas tanytqandar erekshe kóp boldy. Shyrqalǵan án-jyrdyń deni osy bir qasıetti aspaptyń súıemeldeýimen oryndalyp jatty. 

– Qazaqtyń qasıetti dombyrasy arqyly ótken tarıhymyzdy, asyl muramyzdy óskeleń urpaqtyń sanasyna tereń sińirý maqsatynda osyndaı merekelik sharalardy ótkizýdiń mańyzy zor. Búgingi kesh halyqtyń kóńilinen shyǵyp jatyr. Balalaryn, nemerelerin jetektep kelgen adamdardyń kóptigi qýantty, – deıdi Zaısan aýdandyq ishki saıasat bóliminiń basshysy Zýmrat Dúısenbaeva. 

Osy kúni saıabaqta aýyl sharýashylyq ónimderiniń jármeńkesi ótip, toıshyl qaýymǵa baýyrsaq pen qurt taratyldy. Mereke qarsańynda dúnıege kelgen sábılerge dombyra syıǵa tartyldy.  

Sonymen qatar ulttyq sport túrlerinen túrli saıys uıymdastyryldy. Qyz-jigitter altybaqan teýip, aqsúıek oıynyn oınady. Odan basqa 25 kelilik qaptaǵy un men qantty kóterip saıysqandar merekeniń kórigin qyzdyra tústi. Bir qyzyǵy atalǵan saıysta erlerden góri áıelder myqty bolyp shyqty. Qaptaǵy qant pen undy kóterýde názik jandy arýlardyń aldyna túsken eshkim bolmady ras. Sóıtip Zaısandaǵy merekelik shara bı keshimen túıindeldi. 

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir