Arys qalasynyń 150 balasy Kaspıı jaǵalaýyndaǵy lagerlerde demalady

Shildeniń 16-30 aralyǵynda Aqtaýdaǵy «Baldáýren» balalar lagerinde Arys qalasynyń 50 balasyna, «Alaý» lagerinde 100 balaǵa jazǵy demalys uıymdastyrý josparlanýda.

Oblystyń memlekettik qyzmetshileri,  dárigerleri men muǵalimderi, munaıshylar men iri kásiporyndary jarylys saldarynan zardap shekken turǵyndarǵa kómek retinde bir kúndik jalaqysyn aýdardy.

Arys jurtshylyǵyna qoldaý kórsetý maqsatynda «Nur Otan» partııasynyń oblystyq, aýdandyq fılıaldarynda, sonymen qatar «Jastar» resýrstyq ortalyqtarynda, Qazaqstan halqy Assambleıasy janyndaǵy «Qoǵamdyq kelisim» jáne «Biz adambyz-Biz birgemiz» qaıyrymdylyq qory bazasynda arnaıy gýmanıtarlyq kómek jınaý pýnktteri ashylyp, 8 tonna kıim, 6 tonna azyq-túlik jınalyp, alǵashqy gýmanıtarlyq júk 27 maýsym kúni temir jol arqyly jóneltilgen. Onyń ishinde azyq-túlik, kıim-keshek, dári-dármek, jeke gıgıena quraldary jáne birinshi kezekte qajetti zattar qamtylǵan. Bul sharalar áli de jalǵasyn tabýda.