Bekzat Sattarhanov týraly kórkem fılmniń tusaýkeseri ótti

Elordadaǵy "Han Shatyr" oıyn-saýyq ortalyǵynda "Bekzat" kórkem fılminiń jabyq kórsetilimi ótti dep habarlaıdy Qamshy.kz aqparat agenttigi Sputnik Qazaqstan saıtyna silteme jasap.

Fılmdi kórýge Bekzat Sattarhanovtyń ata-anasy, aqparat jáne qoǵamdyq damý mınıstri Dáýren Abaev, mádenıet jáne sport mınıstrliginiń sport jáne dene shynyqtyrý isteri komıtetiniń tóraǵasy Serik Sápıev, "Habar" agenttigi" AQ basqarma tóraǵasynyń birinshi orynbasary Rınat Kertaev keldi.

"Bekzat" kórkem fılminiń rejısseri – Murat Bıdosov, ssenarıı avtory – Serjan Zakeruly. Kınokartına "Habar" agenttiginiń tapsyrysymen túsirilgen.

"Habar" telearnasynyń bas prodıýseri Aıdos Turysbektiń aıtýynsha, "Bekzat" fılmi Túrkistan, Shymkent, Taraz qalalarynde jáne shetelde túsirilipti.

"Bekzat Sattarhanovtyń anasy Syrlykúl Adyrbekqyzy jýrnalısterge balasy týraly fılm túsirilgenine qýanyshty ekenin jetkizdi.

"Búgin – meniń týǵan kúnim. Fılmniń tusaýkeseri týra osy kúnge sáıkes kelipti. Bul – qýanyshty jaǵdaı. Balamyz týraly túsirilgen fılmniń tusaýkeserine keldik. Kıno sátti túsirildi dep oılaımyn. Fılmge baǵany halyq beredi. Osy kınony túsirgen azamattarǵa alǵys aıtamyn", - deıdi ana.

Al Bekzattyń ákesi Seıilhan Sattarhan uly týraly túsirilgen fılmge halyqtyń kóp keletinine senimdi.

"Bekzattyń kınosy dese, barlyǵy keletinin bilemin. Biraq ol sapaly túsirilýi qajet", - deıdi áke.

Fılmdi túsirýge qansha qarjy ketti?

"Habar" agenttigi" AQ basqarma tóraǵasynyń birinshi orynbasary Rınat Kertaev fılmge qansha qarjy bólingeni týraly aıta almaıtynyn jetkizdi.

"Árıne, budan úlken deńgeıde álemdik kıno prokatqa shyǵaratyn sapada fılm túsirýge bolady. Biraq biz otandyq serıaldardy jasaýǵa arnalǵan aýqymda sapaly dúnıe jasaýǵa tyrystyq. Kelisimshartqa sáıkes, kınonyń naqty bıýdjetin aıta almaımyn. Biraq qymbat, sýper bıýdjetti joba dep te aıta almaımyn", - dedi ol.

"Bekzat" fılmi qashan kórsetiledi?

Sonymen qatar Rınat Kertaev bul fılmdi qalyń kórermen qashan kóre alatynyn aıtty.

"Buıyrtsa, osy jyldyń qazan aıynda "Bekzat" fılmi kınoteatrlardan kórsetiledi. Oǵan deıin Nur-Sultan, Túrkistan, Shymkent qalalarynda ashyq kórsetilim jasaý josparda bar. Al serıal retindegi nusqasyn kórermender 2019 jyldyń 16 jeltoqsany – Táýelsizdik kúni "Habar" telearnasy men "Habar" agenttigine qarasty arnalardan kóre alady", - dedi basqarma tóraǵasynyń birinshi orynbasary.

Bekzat Sattarhanov týraly ne bilemiz?

Bekzat Sattarhanov 1980 jyly 4 sáýirde Túrkistan qalasynda dúnıege kelgen.

Bylǵary qolǵap sheberi 2000 jyly 20 jasynda Olımpıada chempıony atanǵan. Sol jyly 31 jeltoqsanda jańa jylǵa 15 mınýt qalǵanda Shymkent qalasy mańyndaǵy Temirlan beketinde Bekzat jol apatynan qaza tapty.

Áýesqoı boksta qazaqstandyq sportshy 143 jekpe-jek ótkizip, 132 kezdesýinde jeńiske jetken.