Saparbaev nesıesi óteletinderdiń tizimine kimder enetinin aıtty

Eńbek jáne halyqty áleýmettik qorǵaý mınıstri Berdibek Saparbaev turmysy tómen azamattardyń tizimi qalaı jasalatynyn túsindirdi. Sol boıynsha banktegi kredıttiń bir bóligi óteledi dep habarlaıdy Qamshy.kz aqparat agenttigi Sputnik Qazaqstan saıtyna silteme jasap. 

"Mınıstrlikke naqty mindet júkteldi. Biz osy boryshkerlerdiń kategorııasyn anyqtaýymyz qajet. Qazirgi tańda alty sanat anyqtaldy. Ol – kópbalaly, asyraýshysynan aıyrylǵan, jetim balalar, ataýly kómek alatyndar. Barlyǵynyń málimetteri men tizimi mınıstrlikte bar. Jetim balalarǵa qatysty málimetti bilim mınıstrligi beredi. Solardan ony da alamyz", - dedi Saparbaev májilistiń jalpy otyrysynda.

Mınıstrdiń aıtýynsha, bankter men mıkroqarjylandyrý uıymdary óz kezeginde boryshkerlerdiń tizimin jasaıdy da, memlekettik nesıe bıýrosyna jiberedi. Bıýro ol tizimdi qorǵa beredi. Al qor óz kezeginde mınıstrlikke usynady.

"Biz ol tizimdi taǵy tekseremiz. Sebebi mınıstrlik osy baǵdarlamanyń ákimshisi bolyp sanalady. Jańaǵy aıtylǵan 88 mıllıard teńge bizdiń mınıstrligimiz arqyly ótedi. Biz tizimdi teksergennen keıin ol aqshany qorǵa aýdaramyz. Qor ary qaraı ekinshi deńgeıli bankter men mıkroqarjylandyrý uıymdaryna aýdarady. Barlyq málimet bar. Biz ol aqshanyń durys tólengenin baqylap otyramyz", - dedi Saparbaev.

Toqaevtyń tapsyrmasy

Aıta keteıik, prezıdenttiń tapsyrmasy boıynsha kepilsiz kredıt alǵan 5 mıllıonǵa jýyq adamnyń aıyppuldary men ósimaqylary óteledi. Al turmysy tómen azamattar úshin osyndaı jeńildikpen birge 300 myń teńgege deıingi qaryz somasy keshiriledi. Biraq kredıttiń somasy 3 mıllıon teńgeden aspaýy qajet.

Turmysy tómen azamattardyń qataryna kópbalaly otbasylar, múgedek balasy bar otbasylar, asyraýshysynan aıyrylǵandar, jetim balalar jáne ataýly áleýmettik kómek alatyndar jatady. Parlament májilisi tıisti zań jobasyn maquldady, endi ony senatta qaraıdy.