Semeıde Oljas Súleımenov atyndaǵy ortalyq ashyldy

Shákárim atyndaǵy Semeı memlekettik ýnıversıtetinde «Nevada-Semeı» antııadrolyq qozǵalysynyń jetekshisi, aqyn, qoǵam qaıratkeri Oljas Súleımenov atynda ortalyq ashyldy. «Rýhanı jańǵyrý» aıasynda qolǵa alynǵan saltanatty sharaǵa áıgili aqynnyń ózi kelip qatysty dep habarlaıdy Qamshy.kz aqparat agenttigi.  

Bul ortalyqta stýdentterge aqynnyń shyǵarmashylyǵymen, ómir jolymen, qaıratkerlik isterimen jan-jaqty tanysýǵa múmkindik beretin materıaldar jınaqtalǵan. 

Semeıge kelgen saparynda Oljas aqyn tarıhy tereńge tamyr jaıǵan qart shahardyń kóshelerin aralap, Beıbitshilik aralynda jastarǵa arnalǵan «Adamǵa tabyn, Jer endi» dep atalǵan tárbıe saǵatyn ótkizdi. 

– Sizderdiń ákelerińiz ben atalaryńyz, analaryńyz ben apalaryńyz ıadrolyq qarýǵa qarsy kúresip, qanshama jyl boıy halyqty ýlap kelgen polıgondy toqtatty. Búgingi jas urpaq, sizder osy tarıhty esten shyǵarmaı, qasiretti ólkeniń qadirine jete bilýlerińiz kerek. Týǵan qalalaryńyzdy súıispenshilikpen damytýǵa kúsh salyńyzdar. О́ıtkeni bul qasıetti óńirde Abaı, Shákárim, Muhtar sııaqty uly tulǵalar dúnıege kelgen, – dedi semeılik jastarmen kezdesý barysynda Oljas Súleımenov.