Aqtaýda balalarǵa qaıyrymdylyq sharasy ótti

1 maýsym kúni Aqtaýdaǵy «Mańǵystaý arena» sport saraıynda «Ákem, anam jáne men: tatý otbasymyz» atty sporttyq jáne qaıyrymdylyq aksııasy ótti. Onda Mańǵystaýdaǵy salaýatty ómir saltyn qalyptastyrý ortalyǵy 300 balaǵa syılyqtar tabys etti.

Otbasylyq úlgidegi oblystyq balalar aýylynyń tárbıelenýshileri, kámeletke tolmaǵandarǵa beıimdelý ortalyǵy, kóp balaly otbasylardan shyqqan balalar men múmkindigi shekteýli balalarǵa arnalǵan konkýrstar, estafetalar, zýmba bıi uıymdastyryldy. Balalarǵa táttiler, oıynshyqtar jáne túrli syılyqtar berildi.

Aksııany oblystyq jáne qalalyq ákimdikter, Mańǵystaý oblystyq densaýlyq saqtaý basqarmasy, «Mindetti áleýmettik medısınalyq saqtandyrý qory» Mańǵystaý fılıaly, bankter jáne aımaqtyq kompanııalar qarjylandyrdy.

Mańǵystaý oblysynyń ákimi Eraly Toǵjanovtyń atynan aksııaǵa qatysýshylardy oblystyq ishki saıasat bólimi bastyǵynyń orynbasary Muhtar Ibraımov quttyqtady.

Oblystyq salaýatty ómir saltyn qalyptastyrý ortalyǵy aksııanyń 300 kishkentaı qatysýshysyna syılyqtar men oıynshyqtar tabystady.

- Qurmetti balalar! Sizder – úlken baqyttyń kishkene bóligisizder, árbir eresek adamnyń ómirin shynaıy qýanysh pen jylýlyqqa toltyratyn ǵajaıyp jansyz. Balalar da mahabbat pen qamqorlyqqa, ata-ananyń qamqorlyǵyna muqtaj jáne árbir balanyń júregi bul kishkene baqyttan aıyrylmaýy kerek. Balalar meıramynda árbir balaǵa qamqor otbasy jáne balalyq shaqty alańsyz ótkizýdi tileımin. Balalardyń kúlkisi elimizdi jarqyratyp, qulpyrtsyn. Mańǵystaýdyń árbir kishkentaı turǵyny deni saý jáne baqytty bolsyn, - dedi «MO salaýatty ómir saltyn qalyptastyrý ortalyǵynyń» atqarýshy dırektory Baný Uzaqbaeva.

Salaýatty ómir saltyn qalyptastyrý ortalyǵynyń qyzmetkerlerine Aqtaý qalasynyń №2 arnaıy orta mektebi, oblystyq otbasylyq úlgidegi balalar aýyly jáne kámeletke tolmaǵandardy beıimdeý ortalyǵy, «Biz - adambyz - birgemiz» qoǵamdyq birlestiginiń atynan alǵys hattar berildi.

-Búgin balalardy tól merekesimen quttyqtaýǵa keldik. Medısınalyq saqtandyrý qory fılıaly atynan balalarǵa jemis-jıdekter, taǵamdar ákeldik. О́zderińiz bilesizder, 2020 jyldan bastap densaýlyq saqtaý salasynda jańa baǵdarlama – medısınalyq saqtandyrý júıesi enedi. Memleket jańa týǵan náresteden bastap, 18 jasqa deıingi balalar úshin jarna tólep, avtomatty túrde saqtandyrylǵandar tizimine engizip otyr. Budan bólek, densaýlyǵynda aqaýy bar balalar da memlekettiń qamqorlyǵynda. Balalar – keleshektiń aınasy. Olardyń densaýlyǵy – eldiń bolashaǵy, - dedi «MÁMSQ» Mańǵystaý fılıalynyń bólim basshysy Aıgúl Dáden.