Halyqqa shyn jany ashysa, Arys apaty kezinde Áblıazov qaıda boldy?

Nur-Sultan qalasynda ótken «Nur Otan» partııasynyń beıbit sherýinde Májilis depýtaty Baqytbek Smaǵul osylaı dedi.

«Janymyz qınalyp otyrǵanda, qoı terisin jamylǵan Ábilázov sııaqtylar halyqty arandatyp, ortaǵa ot salǵysy keledi. Sóıtip halyqtyń arasyna iritki salýda. Eger shyn jany ashyǵan bolsa, keshegi Arys apaty kezinde qaıda boldy? Halyqtyń, eldiń turaqtylyǵyn, berekesin alǵysy kelip, sýdaı shashqan aqshasynan zardap shekkenderge bir tıyn kómek berdi me? Osy turǵan barsha halyqtyń bireýine bolsyn bir úzim nan berdi me? Bergen joq, árıne! Sondyqtan, áleýmettik problemalardy jeleý etip, eldiń ishine ylań salyp, halyqtyń shyrqyn buzýǵa eshqashan jol bermeımiz», – dedi Baqytbek Smaǵul.

Beıbit sherýge qatysqan belgili qoǵam qaıratkeri Orazgúl Asanǵazy áıelderin ereýil úshin kóshege jiberip, ózderi úıde otyratyn erkekterge ókpesin aıtty.

«Qazaq «jetimin jylatpaǵan, jesirin qańǵytpaǵan» halyq. Al qazir áıelderin kóshege jiberip, ózderi úıde otyrǵan erkekterdiń tirligi ne degen sumdyq? Bul ne degen masqara! Sondyqtan er-azamat degen atqa saı áreket etip, áıelderine ıe bolý kerek. Jaqsy kúnimizdi jaman dep erteń kóshede tentirep qalmaıyq», – dedi Orazgúl Asanǵazy.

Sonymen qatar ol ákeleri erte ómirden ótip, bes balany analary ósirip, jetildirgenin aıtty.

«Biz ákeden erte qaldyq. Sol kezde anam bes balasyn ózi ósirdi. El bar, aǵaıyn bar. Solarǵa arqa súıedi. Eshqashan sol kezdegi aýdandyq partııa komıtetine baryp, baıym óldi dep qol jaıǵan emes», – dedi Orazgúl Asanǵazy.

Aıta keteıik, búgin Nur-Sultan qalasynda eldiń arasyna iritki salyp júrgen arandatýshylardyń qıturqy áreketterine qarsy halyq beıbit sherýge shyqty. Qaladaǵy «Jeruıyq» saıabaǵyna jınalǵan 1500-den astam azamat táýelsizdigimizdiń tamyryna balta shabatyn jalǵan urandarymen eldiń irgesine syzat túsirýdi kózdeıtin aram pıǵyldy Ábilázov sııaqty keritartpalardyń áreketterine qarsy óz oılary men pikirlerin ashyq aıtty.