Atambaevtyń eskertýi: Meni ustaýǵa kelseńder atamyn! (vıdeo)

Qyrǵyzstannyń burynǵy prezıdenti Almazbek Atambaev óziniń eks-prezıdent mártebesin alyp tastaǵan parlament sheshimine pikir bildirdi dep habarlaıdy Qamshy.kz aqparat agenttigi. 

Keshe Qyrǵyzstannyń Joǵarǵy keńesi Atambaevty eks-prezıdent mártebesinen aıyrdy. Atambaevtyń jaqtastary onyń Qoı-Tash aýylyndaǵy úıine jınaldy. Saıasatker jýrnalıstermen áńgimelesip, jaǵdaıdy túsindirgen.

Onyń sózinshe, elde qazir burynǵy prezıdentti qamaýǵa alýǵa daıyndyq júrip jatqany týraly aqparat bar.

–Meni ustaýǵa daıyndyq júrip jatqanyn bárimiz bilemiz. Kúshtik qurylymdar arasynda da meniń jaqtastarym kóp. Saýatsyz adamdardyń saýatsyz buıryqtaryna shaǵymdanyp UQK, IIM-de júrgen talaı ofıser jylap kelgen maǵan. Men bárine daıynmyn. Qarsylyq kórsetemin.Eger ustaýǵa keletin bolsa, syıǵa alǵan tapansham bar ekenin umytpasyn, men muny ashyq eskertip jatyrmyn. Ońaıshylyqpen berile salmaıtynymyzdy bilsin. Alaıda maǵan jiberetin jigitterdi aıaımyn. Qyrǵyzda "jatyp ólgenshe, atyp ól" degen sóz bar. Meniń janymda eshkim bolmaıdy", — dedi Atambaev.

Burynǵy prezıdent eliniń bir jyl buryn "zań aıasynan shyǵyp ketkenin" málimdedi. Atambaev "bul bılik tek óziniń adamdaryn ǵana qorǵaýdy biledi, unamaıtyndaryn túrmege otyrǵyzyp jatyr" dedi. Ol elin tastap eshqaıda ketpeıtinin de jetkizdi. "Bul – meniń otanym. Qashatyndar – basqa adamdar. Eger kimde-kim meni qurtqysy kelse, erte me, kesh pe, ózderi qashyp ketedi", - dep jaýap berdi tilshilerdiń suraǵyna.