Búgingi Arys: Qala turǵyndary óz úılerinde (vıdeo)

Arys qalasynyń turǵyndary tańǵy saǵat 06:00-de Shymkent qalasy, Bekjan bazarynyń tusynda ornalasqan "Aqmeshit" meshitinen óz úılerine attandy dep jazady Qamshy.kz aqparat agenttigi. 

Halyq Arys qalasynda oryn alǵan tótenshe jaǵdaıǵa baılanysty qaýipsizdikti saqtaý boıynsha jadynamaǵa saı áreket etpek.

Tań beleń alǵan tusta qolynda bar zattaryn jınap, qala halqy jolǵa shyqty. Bul týraly Iаkov Fıodorov esimdi Facebook jelisiniń qoldanýshysy óz paraqshasyna vıdeo júktegen bolatyn.

 

Túrkistan oblysy ákiminiń keńesshisi Sáken Qalqamanov halyqtyń sol ýaqyttaǵy kóńil-kúıin surap, aq jol tiledi. 

Polısııa qyzmetkerleriniń bastaýymen turǵyndar qalaǵa kirdi.

Arys qalasyna halyqty Shymkentten 135 avtobýs tasymaldaýda. Jalpy bas-aıaǵy 30 myńnan astam adam tirkelgen evakýasııalyq oryndardan halyqty qalaǵa kóshirý jumysy oıdaǵydaı atqarylýda. Beısen Tájibaev júktegen vıdeoda Arysqa kirip kele jatqan halyqty kórýge bolady.

Basshylyq adamdary qarapaıym halyqpen birge ár úıge kirip shyqty. Halyq qoldaryna tapsyrylǵan erejege saı jumys istep jatyr.

"Aldaǵy ýaqytta eshqandaı apat bolmasa eken",- degen qorqynyshpen úılerine jetken halyqtyń úreıi sálde bolsa basylǵandaı. Mekemeler ózderiniń jumystaryn bastap ketti. Arys qalasyna jınalǵan aqshamen úılerdiń qurylysyn erterek aıaqtap, barlyǵy qaýipsizdikte bolsa eken deımiz.