О́mirzaq Shókeev: Arys turǵyndary erteń qalaǵa kiredi

Arys qalasynyń turǵyndaryn erteń, ıaǵnı, 28 maýsymda, tańǵy 8.00-de qalaǵa kirgizý bastalady. Bul týraly búgin Túrkistan oblysynda qurylǵan shtabtaǵy baspasóz máslıhatynda oblys ákimi О́mirzaq Shókeev málimdedi dep habarlaıdy Qamshy.kz aqparat agenttigi. 

О́ńir basshysy Arys qalasy men áskerı qoımada oq-dárilerdi tazalaý jáne qalany dezınfeksııalaý sharalary aıaqtalǵanyn, qaýip bulty tolyq seıilgenin málimdedi.

"Arys qalasynyń turǵyndaryn erteń 28 maýsym kúni saǵat tańǵy 8.00-den bastap  uıymdasqan túrde avtobýstyq kolonnalarymen kirgize bastaımyz. Al jeke tulǵalardyń kólikterin saǵat 12.00-den bastap kirgizemiz. Turǵyndardy kirgizý úshin Arys qalasy 17 sektorǵa bólindi. Osy sektorlarǵa oblysymyzdyń  aýdan, qala ákimdikterinen 640 jaýapty (1 aýdan - 40 adam) azamat bekitildi. Árbir 10 úıge 1 qyzmetkerden jaýapty. Turǵyndardy jaıǵastyrý kezinde osy azamattarǵa arystyq kóshe, aýlalardyń belsendileri kómek beretin bolady. Qazirgi tańda Arys qalasyndaǵy tótenshe jaǵdaı tolyq baqylaýǵa alyndy. О́rt oshaqtary sóndirildi. Alańdaýǵa esh negiz joq. Arystyqtarǵa kómek retinde «Túrkistan» korporatıvtik áleýmettik damý qorynda arnaıy esep-shot ashylyp, búgingi tańda 721 mln teńge jınaqtaldy. Túrkistan oblysy ákimdigi tarapynan Arys qalasynyń turǵyndaryna azyq-túlikpen kómek kórsetý jóninde shtab qurylǵan. Qaıyrymdylyq aksııasy aıasynda halyqqa qajetti jalpy kólemi 150 tonna zat jınaldy. Qaraǵandy, Jambyl, Qyzylorda, Aqtóbe, Batys Qazaqstan, Almaty oblystary men Almaty jáne Shymkent qalalarynan jetkizildi. Evakýasııalyq ortalyqtarda elge kómek kórsetildi. Memleket tarapynan da qarjylaı qoldaý bolady. Munyń bári el ıgiligi úshin jumsalady. Qurmetti, arystyqtar! Bizdiń júregimiz de, tilegimiz de bir. Biz elmen birge Arys qalasyn 1 aı ishinde tolyq qalpyna keltirip qana qoımaı, ony odan da jaqsy jaǵdaıǵa jetkizemiz. Ol úshin shydam, uıymshyldyq jáne patrıotızm kerek", – dedi О́.Shókeev. 

Turǵyndar úıine oralǵanda bekitilgen qyzmetkerler foto-vıdeofıksasııa jasap, shyǵyndardy esepteýge kómek beredi. Jaıǵasý barysynda oblystyq polısııa qyzmetkerleri men dárigerler, tótenshe jaǵdaı departamenti men quzyrly mekemeler úzdiksiz qyzmet kórsetedi. 

Sonymen qatar arystyqtarǵa qurylys-jóndeý jumystaryna kómek berý úshin elimizdiń barlyq óńirinen 160  arnaıy brıgada keledi. Árbir oblysqa Arys qalasyndaǵy bólingen sektorlar boıynsha jumystar beriledi. Al QR Qorǵanys mınıstriniń orynbasary Baqyt Qurmanbaev saper-mamandar Arys qalasy men áskerı qoımada oq-dárilerden tazalaý jumystaryn atqarǵanyn aıtty. Arysta 400-den astam áskerı mamandar qala aýmaǵy men áskerı qoımany, kóshelerdi, temir joldy tekserip shyqty. Qala tazalandy. 

Úıińiz ben aýlańyzǵa kirgende kúdikti zattar baıqasańyz 112 nemese 102 nómirine qońyraý shalý qajet. Urlyq boldy degen kúdik bolsa, eshbir zatqa tıispeı, 102 nómirine qońyraý shalý kerek. Úıde qalǵan azyq-túlikti joıyp, sýdy da 10 mınýt aǵyzǵan abzal. Erteń turǵyndarǵa arnaıy jadynamalar ázirlenip, taratylady. 

Tótenshe jaǵdaılar jónindegi komıtet tóraǵasy Vladımır Bekker qaladaǵy áleýmettik nysandar tekserýden ótkenin málimdese, QR Eńbek jáne halyqty áleýmettik qorǵaý mınıstri Berdibek Saparbaev úkimet tarapynan arystyqtarǵa jaǵdaı jasalatynyn, qala jedel qalpyna keltiriletinin jetkizdi.