Qazaq mektepterin kóbeıtip, jaqsy jaǵdaı jasaýǵa qaýqarymyz jetpeı me?

Qostanaılyq ata-analar qaladaǵy jalǵyz qazaq mektebiniń jaǵdaıy nashar ekenin aıtyp shaǵymdandy. Olar mektepti keńeıtýdi nemese jańa qazaq mektep salyp berýdi talap etýde dep jazady Qamshy.kz aqparat agenttigi. 

Eń soraqysy osydan birneshe kún buryn qala ortalyǵyndaǵy №24 mektebin jaýyp, ornyna jańa balabaqsha salýdy josparlaǵan. Alaıda ata-analardyń qarsylyǵynan keıin mektepti taratpaıtyn boldy.

– Osydan biraz ýaqyt buryn qazaq mektebin aýdandyq orys mekteptermen biriktirmek boldy. Alaıda ata-analar narazylyqqa shyqqan soń qazaq gımnazııasyn jappaıtyn boldy. Endi biz qazaq mektebin jańartyp, keńeıtýdi talap etip otyrmyz. Sebebi mektep óte tar ári kishkentaı. Tipti 0-synyptyń oqýshylary qazaq mektebine qarama-qarsy ornalasqan orys mektebine baryp oqıdy. Synyptyń jetispeýshiligi saldarynan orys mektebindegi synyptardy jaldaıdy. Bizdiń Qostanaıda orys tildiler kóp deıdi. Qalaı kóp bolmasyn? Qazaq mektepteriniń sany az. Onyń ózinde jaǵdaı jasalmaǵan. Men ózim sol №24 mektepte oqyǵanmyn. Meniń mektepti bitirgenime shamamen 20 jyl boldy. Biraq mektepte eshqandaı ózgeris joq. Jańarmaǵan, sol baıaǵy qalpynda tur, - deıdi aty-jónin jasyrýdy ótingen qostanaılyq turǵyn. 

Qostanaı qalasynda jalpy 36 mektep bar.  Qazaq mektepteri saýsaqpen sanarlyqtaı az. Kóbisi aralas mektepter.

Qostanaı Reseıdiń emes, qazaqtyń jeri. Reseıdiń ózinde bir qazaq mektebi bolǵan. Atalmysh mekteptiń de jaǵdaıy keremet emes edi. Keıin jabylyp qaldy degen aqparat tarady. Qosh! Bul jaǵy túsinikti. Reseıde qazaq mektebin ashpasaq ta, ózimizdiń elde qazaq mektepterin kóbeıtip, jaqsy jaǵdaı jasaýǵa qaýqarymyz jetpeı me?