Máýlen Áshimbaev Arystaǵy apattan zardap shekken turǵyndarmen kezdesti

Búgin «Nur Otan» partııasy Tóraǵasynyń Birinshi orynbasary Máýlen Áshimbaev Túrkistan oblysynyń Arys qalasynda bolǵan tótenshe jaǵdaıǵa baılanysty aımaqqa arnaıy keldi. Sapar barysynda ol qaýipsiz jerge kóshirilgen turǵyndarmen kezdesti.

Aldymen ol Ordabasy aýdany Tórearyq aýylyndaǵy Táýke han mektebine at basyn burdy. Bul jerde tótenshe jaǵdaıdan zardap shekken Arys turǵyndarynyń bir toby ýaqytsha ornalastyrylǵan.

– Apat aıtyp kelmeıdi. Sondyqtan biz qazir judyryqtaı jumylýymyz kerek. Qazir barsha qazaqstandyqtar sizdermen birge alańdap, kómek qoldaryn sozýda. Halyq arystyqtarmen birge. Bul tótenshe jaǵdaı qazaqstandyqtardy odan ári biriktirip, uıystyra túskenin kórip otyrmyz, – dedi Máýlen Áshimbaev.

Qazirgi tańda elimizdiń barlyq óńirinen Arysqa qaraı gýmanıtarlyq kómekter aǵylyp kelip jatqany belgili. Osy iste «Nur Otan» partııasy da belsendi áreket etýde. Oqıǵa bolǵan kúni partııanyń barlyq oblystyq fılıalynda gýmanıtarlyq kómek qabyldaý oryndary ashylyp, olar táýlik boıy jumys istep tur.

– Qazirdiń ózinde elimizdiń 9 oblysynan kómek kelip jetti. Gýmanıtarlyq kómekten bólek, partııa tarapynan zardap shekken ata-analar men balalarǵa psıhologııalyq qoldaý kórsetilip jatyr. Jasotandyqtardyń belsendiligin de erekshe atap ótken jón. Memleket basshysy Qasym-Jomart Kemeluly Toqaevtyń ózi arnaıy kelip, jaǵdaımen tanysyp shyqty. Qazir jaǵdaı tolyǵymen baqylaýda. Qalany qalpyna keltirý jumystaryna bizdiń partııa da tikeleı qatysyp, jumystyń júıeli túrde júrgizilýin baqylaýda ustaıdy, – dedi Máýlen Áshimbaev.

Partııa tarapynan uıymdastyrylǵan gýmanıtarlyq kómektiń jalpy kólemi 341 tonnany quraıdy. Osy aptanyń sońyna deıin qalǵan aımaqtardan da avtokerýender shyǵady. Sondaı kómektiń bir tobyn qarsylap alǵan Máýlen Áshimbaev «Nur Otan» partııasynyń bul baǵyttaǵy jumystary ári qaraı da jalǵasatynyn aıtty.

Sondaı-aq Máýlen Áshimbaev tótenshe jaǵdaıǵa baılanysty qurylǵan jedel shtabqa arnaıy kelip, atqarylyp jatqan jumys barysymen tanysty. Odan bólek zardap shekken balalarmen jumys istep jatqan psıholog mamandarmen kezdesti.