Arnaıy shyǵarylym: Arys qalasy jarylystan keıin (eksklıýzıvti vıdeolar)

Qamshy.kz aqparat agenttiginiń tilshileri Arys qalasyna baryp, oqıǵa ornynan aqparat taratyp jatyr.

Qazirgi ýaqytta jýrnalıster Arys qalasynda oqıǵa orynyn aralap júr. Olar arnaıy jılettermen saqtyq sharalaryn saqtaı otyryp, jýrnalıst ekendikterin rastaıtyn arnaıy qujattarymen kirdi. Olarǵa jarylys bolǵan aımaqtardy emes, qalanyń ishin ǵana aralaýǵa ruqsat etildi.

 

Túrkistan oblysy Arys qalasynda alǵashqy snarıad bazarǵa túsken. Saýdagerler bazardaǵy oryndaryn tastap qashqan. Saýdagerler tipti satyp otyrǵan zattaryn da jınap úlgermegen. 

Arysqa kire beriste Aqdala aýylynyń qaqpasyn polıseıler men áskerıler kúzetip tur. Olar qalaǵa qaıtyp jatqan turǵyndardy kirgizbeıdi.

"Adamdar bolǵan soń bul jerde tyńdamaı kirip jatqan adamdar bar. Olarǵa túsindirme jumystaryn júrgizip jatyrmyz. Halyq pasportym qalyp qoıdy, qujatym bar edi dep jatyr. Keıbireýleri óz kózimen kórgisi kelip jatqan bolar. barynsha túsindirip jatyrmyz. Túsingenderi blok basynan qaıtyp jatyr. Qalǵandaryna qazir reıd sharalary júrgiziletin bolady. Jolda ózderińiz baıqadyńyzdar bir stolby qulap, kólikti basyp qalǵan. Qalanyń ishinde de sol jaǵdaı. Sonyń barlyǵy retke keltirilse svet, gaz beriledi", - dedi Túrkistan oblysy Tótenshe jaǵdaılar departamentiniń basshysy Nurǵalı Júnisov.

Arys qalasynda 45 myń turǵyn bar. «Bógen» sýqoımasy qatań baqylaýda tur jáne odan keler qaýip joq.

Qala aýmaǵyn tún boıy ulttyq gvardııanyń 580 sarbazy men 345 polısııa qyzmetkeri kúzetti. Olar urlyq-qarlyqpen aınalysyp júrgen 3 adamdy ustady.

Tótenshe jaǵdaıǵa baılanysty 22 qonystandyrý orny ashyldy. Bul oryndarda 3566 adam bar. Onyń 623-i – balalar. Kóshirilgen turǵyndar azyq-túlikpen qamtamasyz etilgen. Aýdan, qala ákimdikteri júktelgen mindetke saı jumys atqarýda. Turǵyndardy evakýasııalyq oryndarǵa jetkizýin qadaǵalaýda.

Qonystandyrý ortalyqtarynyń jumysy tótenshe jaǵdaı tolyq sheshimin tapqansha jalǵasady. Qazirgi tańda Arys qalasyna kirý qaýipti. Jan-jaǵy qorshalǵan. Bul maqsatta QR Ishki áskeriniń 1800 áskerı qyzmetkeri jáne 50 tehnıka jumyldyrylǵan.

Oqıǵa ornynan arnaıy tilshiler: Mııat Káshibaı, Bek Baıtas