Serik Ábikenuly: "Pysh-pyshtyń kisi óltirerlik kesiri baryn umytpaıyq"

Aý, Qyzylaǵashta Kárim ákámiz apat ornyn samoletpen aınalyp qana shyǵyp qaıta Astanaǵa tartyp ketpep pe edi, qyryq adam qyrylyp jatqanda dara da danamyz, eldiń basy, ulttyń atasy ol jaqqa attap baspap edi ǵoı. Jaraıdy, "jýas júndegenge jaqsy" delik, aýzy qyzyp turǵanǵa bıdaı bola tursyn, sol úshin bılik qoı.

Anaý, qoımadaǵy ottan qyzyp, bereketsiz ushyp jatqan oqtumsyqtardan qorǵalaǵan sarbazǵa obal boldy, ata-anasymen qoshtasyp edi, "qorqaq, qatyn, anaý-mynaý, pysh-pysh". Áskerde bolǵan azamattar mundaıǵa ilespese kerek edi, sebebi, talaı keýdemsoqtyń kazarmaǵa kirgende-aq zeńbirektiń snarıady bylaı turyp, "dedtyń" qabaǵynan synyp ketetinin jaqsy biledi. Keıin jalǵyz ózi bir rota jaýdy jaıpap, bir botolondy bir ózi bóktergideı búrip tastaǵan batyr bop oralatyn solar. Al álgi sarbazdyki tabıǵı, úreı men namys arpalysyp, tisti shyqyrlatyp baryp shyqqan tamshy bolar, zýlaǵan oq, bomba arasynda ata-anasymen baquldasyp otyr. Ne kúleri bar, ne mineri bar? Tynyshtyqta ósip, qan kórmegen jigitter baqyra qashsa qaıter edik? Sol sarbazdyń kóshede qalyp qoıǵan eki turǵynǵa qalqan bop otyryp, halyqty tastaı qashqan áskerılerge " Formany sheshińder, sender oǵan laıyq emessińder" - dep kúıingen vıdeosy baryn eshkim elemedi, bizge keketip, kósemsip, tar shekedegi shala aqylmen bólisip qalǵanǵa alǵashqysy jaraıdy.

Qanshama adamnyń balasynan bóline qashyp jatqanynan-aq Úreı degenniń qandaı qudiret ekenin bilýge bolar. Sol sarbaz oq tıip sheıit bolsa, nemese, apat basylǵan soń fbdaǵy qaharmandardyń kekesinin kórip atylyp ólse ne dermiz?! Pysh-pyshtyń kisi óltirerlik kesiri baryn umytpaıyq. Áskerde bolǵan azamattar biledi, artqoımanyń mańynda mindetti túrde ınjenerlik qoıma degen bolady, onda selıtra, dınamıt, trotıll sekildi qoparylysqa kerek zattar tonnalap saqtalady. Eger Arysta ondaı qoıma bolsa, oǵan ot tıse qalanyń ornynda úlken shuńqyr ǵana qalar edi... saqtady qudaı!

Serik Ábikenulynyń feısbýk paraqshasynan facebook.com