Shúkeev pen Ermekbaevqa: Apat "orys" qalasynda emes, "Arys" qalasynda bolyp jatyr!

Búgingi Arystaǵy jarylysqa baılanysty О́mirzaq Shúkeev shuǵyl túrde brıfıng ótkizdi dep jazady Qamshy.kz aqparat agenttigi.  

Sóz basynda О́mirzaq Shúkeev Arys qalasynda jarylys bolǵanyn, jarylystyń sebebi oq-dári saqtalǵan qoımadaǵy órt ekenin aıtty. 

"Búgin Arys qalasynda tótenshe jaǵdaı oryn aldy. Biz 9:20-da tótenshe jaǵdaı týraly aqparatty estip, Qorǵanys mınıstrligimen birge qajetti sharalardy jasap jatyrmyz. Eń birinshi qala turǵyndaryn evakýasııalaý kerek boldy. Qazirgi tańda qaladaǵy turǵyndardyń barlyǵy derlik qaýipsiz jerge kóshirildi. Sonymen qatar qalada qalyp qoıǵan turǵyndardy izdestirip, qaýipsiz jerge kóshiretin bolamyz. Al ázirge órt tolyqtaý aýyzdyqtalǵan joq ", - dep málimdeme jasady О́mirzaq Shúkeev. 

Aıta ketsek, О́mirzaq Shúkeevtiń kúndizgi málimdemesi de orys tilinde bolǵan edi. Oǵan asa mán bermedik. Sebebi kóbimizdi Arystaǵy aǵaıynnyń jaǵdaıy alańdatty. Keshke deıin alańdaýmen bolǵan halyq resmı málimdemeni kútti. Keıinnen Túrkistan oblysynyń ákimi men Qorǵanys mınıstriniń qatysýymen brıfıng ótetinin belgili boldy. Túrkistan oblysynyń ákimi sóz basyn qazaq tilinde bastap, keıin orys tilinde jalǵastyrdy. Qorǵanys mınıstri de qazaq tilinde 2-3 sóılem aıtýdan ári asa almady. Arysta bolǵan apat týraly brıfıngtiń jartysynan kóbi orys tilinde ótti. 

Balasyn qushaqtap qaıda qasharyn bilmeı júrgenderdiń barlyǵy derlik qazaq ekenin áleýmettik jelide taralǵan vıdeolardan-aq ańǵarýǵa bolady. Sońǵy jylǵy resmı derekterge súıensek, Arys qalasynyń halqynyń sany  74 myńnan asady. Búgingi jarylystan zardap shekkender de, ár óńirde arystyqtardyń tileýin tilep, amandyǵyn Qudaıdan surap otyrǵandar da  — qazaqtar. Buǵan eshkim daý aıta almas. Al Shúkeev pen Ermekbaev orystanǵan jerde emes, qazaqy qaımaǵy buzylmaǵan aımaqta bolǵanyn umytqan sekildi. Brıfıngti de, kúndizgi málimdemesin de qazaq tilinde jasasa bolmas pa edi?! Álde Shúkeev ózi basqaratyn oblystyń 70 paıyzdan astamyn qazaqtar quraıtynynan habarsyz ba? Jalpy Shúkeev qaı eldiń ákimi, Ermekbaev she?!