Áıeldiń ústine bazardyń qabyrǵasy qulap, qaza tapty

Tarazdaǵy Jambyl alańynda burynǵy «Shahrıstan» bazarynyń qabyrǵasy qulap, sol jerden ótip bara jatqan áıeldi basyp qaldy dep habarlaıdy Qamshy.kz aqparat agenttigi QazAqparat saıtyna silteme jasap.

Aıta keteıik, «Kóne Taraz» tarıhı-arheologııalyq parkiniń janynda ornalasqan «Shahrıstan» bazary qaıta jańǵyrtýǵa baılanysty jabylǵan bolatyn. Jospar boıynsha, burynǵy bazar «Shahrıstan» atty tarıhı-mýzeı keshenine aınalýy tıis. Bıyl bazardyń ǵımaratyn súrý jáne keshendi salý jumysy bastalǵan bolatyn.

Qaıǵyly oqıǵa búgin bazar aýmaǵyna kiretin mańda qoqys tazalaý kezinde bolǵan. Sol jerden jolaı ótip bara jatqan áıel qulaǵan qabyrǵanyń astynda qalyp qoıǵan. Bul jaǵdaıdyń vıdeosy áleýmettik jelide jarııalanyp, qala turǵyndary arasynda qoǵamdyq rezonans týǵyzdy.

«Qoqysty tıep jatqanda ınertti materıaldyń salmaǵyna shydaı almaı, qabyrǵa qıraǵan. Aıta keteıik, burynǵy bazardyń qorshaý qabyrǵalary sapaly kirpishten jasalǵan, sondyqtan buzylmaı, qurylys júrip jatqanda aýmaqty kózden tasalap turatyn qorshaý retinde qaldyrylǵan edi. Qurylys aıaqtalǵan soń ony súrip tastaý josparlanǵan. Qazirgi tańda marqumnyń týystaryna qajetti kómek kórsetildi. Quqyq qorǵaý organdary atalmysh jaıt negizinde qylmystyq is qozǵady, tergeý júrip jatyr. Tergeý nátıjesi shyqqan soń kináli azamattarǵa tıisti shara qoldanylady», - dep málim etti qala ákimdigi.