BI Group kaıdzenmen dostasý arqyly neden utty?

2012 jyl. Qaraǵandy. 5 qabatty «Besoba» turǵyn úıi bir demde kózden ǵaıyp boldy.

2015 jyl. Qyzylorda. Taǵy da 5 qabatty úı paıdalanýǵa berilmeı jatyp jaramsyz bolyp shyqty.

2016 jyl. Almatynyń «Alǵabas» yqsham aýdany. 9 qabatty turǵyn úı turǵan ornynan jyljyp, qısaıyp qaldy.

Keńes Úkimeti kezinde túsirilgen «Premııa» degen kıno bar. Aralaryńyzda kórgender de bar shyǵar. Barlyq is-qımyl bir kabınettiń ishinde túsirilgen. 1974 jyly úlken ekranǵa jol tartqan bul fılm kezinde memlekettik premııa alyp, Polshadaǵy halyqaralyq forýmda erekshe kózge tústi. «Premııany» kóre otyryp, sol kınodaǵy taqyryptyń búgingi kúni de óz ózektiligin joımaǵanyna qaıran qalasyń. 45 jyl buryn da, 45 jyldan keıin de qurylys salasynyń qordalanǵan máseleleri esh ózgermegenin túsinemiz. Bir materıaldyń joqtyǵynan búkil brıgadanyń jumysynyń toqtap qalýy, qyzmetkerlerdiń aılyǵynyń durys berilmeýi, qatardaǵy jumysker sapany oılap jany ashysa da, basshysynyń oǵan bas qatyrmaýy, merdigerdiń qurylys alańyna bas suqpaýy – biz biletin máselelerdiń shet jaǵy. Sonyń nátıjesi –ár túrli jyldary elimizde qırap qalǵan qurylys nysandary.

Kaıdzen degen ne?

Kaıdzenniń Qazaqstanǵa kelgenine kóp ýaqyt bola qoıǵan joq. Áli de bireýler úshin kaı jáne dzen degen eki túbirden turatyn sóz qulaqtaryna oǵash estiledi. Amerıkadan bastaý alatyn, alaıda samýraılar eli baǵyn ashqan kaıdzen aqyryn júrip, anyq basýǵa úıretedi. Bir mezette taý qoparý emes, kún saıyn qolǵa kúrek ala otyryp eńbektený – kaıdzenniń pálsapasy. Qarapaıym tilmen aıtqanda, adamnyń sapaly jumys jasaýyna ortasy da, jumys orny da, tipti ózi de kedergi keltirmeýi tıis. Kaıdzen degen jınaqtylyq, tazalyq,  únemdelgen qarajat, tatý-tátti ujym jáne sapa. Tipti «Premııa» kınosynda oryn alǵan máseleler kaıdzen boıynsha shyǵyn bolyp eseptelinedi. Tarqatyp aıtatyn bolsaq, keńselik jumysta da, zaýytta da biz únemi artyǵymen oryndaımyz, ýaqytynda kelmeı/jasamaı kúttiremiz, anda-mynda júgirip sandalamyz, qaǵazbastylyqtyń arqasynda kóp sabylamyz,  «kerek bolyp qalar» dep qor jınaımyz, qatemen jumys jasap qınalamyz, qol sozym jerde bolmaǵandyqtan artyq qımyl jasaımyz, qarapaıym qyzmetkerdiń shaǵymyna/pikirine qulaq túrmeımiz. Kaıdzen boıynsha jumys jasaıtyn kompanııa qyzmetkerin qorqytyp ustamaıdy. Tipti ony jumystan shyǵarýǵa nıettenbeıdi. Qyzmetker komfortyn oılap ózi-aq ketkisi kelmeıdi. Jumys prosesin kaıdzenge negizdegen qazaqstandyq kompanııalardyń biri ári biregeıi –  BI Group. BI Group-tyń nátıjelerine qarap at basyn kaıdzenge burǵan kompanııalardyń sany búginde birshama ósken.

Kaıdzenge BI Group qalaı tap boldy?

2016 jylda ótken qurylysshylardyń forýmynda alǵash ret kaıdzen týraly aıtylady. Sol jyldardan beri 8000-nan astam qyzmetkeri bar alpaýyt BI Group kompanııasy kaıdzenniń qaǵıdalaryn negizge ala otyryp jumys istep kele jatyr. Zýlap óte shyqqan úsh jyldyń ishinde kaıdzenge degen, BI Group-qa degen qyzyǵýshylyq on ese artty desek qatelespespiz.

2017 jyly ótken Jastar forýmynda mesenat, BI Group holdınginiń aksıoneri, dırektorlar keńesiniń tóraǵasy Aıdyn Rahymbaev: «Biz elıt klas úshin emes, qarapaıym halyq úshin ter tógemiz. Elıt klas sanatyndaǵy úılerimiz 5%-dan aspaıdy. Sebebi bizge qarapaıym tutynýshy klıenttiń kóbirek bolǵany asa mańyzdy. Klıent kóp bolsa, bolashaq ta jarqyn dep bilemin. «Toıota» álde «Ferrarı» baı-qýattyraq sizdińshe? Árıne, «Toıota». Shyǵyndy azaıtý kerek dep únemi aıtamyn. Shyn máninde, únemdeý mádenıetin biz oı-sanamyzdan bastaýymyz maqsat. Men jáne bizdiń menedjerler Japonııadaǵy jaǵdaıdy kózben kórý úshin arnaıy ushyp bardyq. Bilesiz be, betburys alyp keletin úlken ózgerister usaq-túıekten bastaý alatynyn túsindim. Kúnde tańerteń aldyǵa bir qadam jasasańyz, sizdi eshkim toqtata almas. Kerisinshe turyp-turyp kenetten «kettik» deseńiz, artyńyzdan ilesetin adam tappaısyz. Muny basshy ǵana emes, qatardaǵy ár qyzmetker jadynda ustaýy tıis. Basshy ǵana emes, jaı qyzmetker de ózgeriske umtylǵany durys», - degen bolatyn.

BI Group salǵan úı vıgvam emes

Sergeı Evgenevıch Korchagın – kaıdzendi qazaqstandyq, reseılik kásiporyndaryna engizgen asa tájirıbeli Lean trener. Toyota Engineering Corporation tarapynan beriletin halyqaralyq sertıfıkatynyń Grade 4  dárejesin alǵan azamat. BI Group-tyń kaıdzendi engizý prosesin bastan-aıaq baqylaǵan Korchagın myrza birer saýalymyzǵa jaýap bergen bolatyn.

Sergeı Evgenevıch: «Kaıdzendi engizý múmkin emes. Tártip, talap bar jerde ǵana kaıdzendi damytýǵa bolady dep aıtqanmyn. BI Group kaıdzen júıesine deıin de isi alǵa basyp turǵan kompanııa edi. Men bul kompanııany erekshe jaqsy kóremin. Basshysy Aıdyn Rahymbaevty erekshe qurmetteımin. Osyndaı lıderi bar kompanııanyń kaıdzenge kelýi zańdylyq dep túsinemin. Jalpy, 2011 jáne 2013 jyldary BI Group kaıdzenmen jumys istegisi keledi. Biraq oı júzege aspaǵandyqtan, 2016 jyly meni Lın qyzmetin qurýǵa shaqyrady. О́z basym kez kelgen kompanııany qoly-aıaǵy, kózi hám júregi bar tiri aǵza retinde elestetemin. Iаkı kompanııanyń qaryshtap damýyna eki nárse tikeleı áser etetindigin bilemin: olar – qalyptasqan júıe jáne sondaǵy qyzmetkerlerge degen syılastyǵy/súıispenshiligi. Jap-jaqsy kompanııany odan saıyn jaqsartý úshin eń birinshi kezekte osy eki máselemen aınalystym. BI Group-tan ketkenimmen, syrttaı bul kompanııa úshin taqymymdy qysyp júremin. Onyń ózge kompanııalardan erekshiligi – korporatıvtik mádenıettiliginde dep bilemin. О́z basym BI Group-ta eńbek etkenimdi maqtanyshpen aıtamyn.

Búginde BI Group 24 aıda emes, 18 aıda páterdiń kiltin ıesine ustatady. Bul qýanarlyq kórsetkish! Salynyp jatqan qurylysta bir jumys kúninde 1 mıllıon teńge ketetinin eskersek, bul kompanııa 6 aıda qanshama soma únemdep jatqanyn oısha eseptep kórińizshi. Eń qyzyǵy, bul bastamasy ǵana. Kaıdzen bar, demek másele joq desem, ótirik bolar. BI Group-tyń alar asýy alda. Oǵan qyzyǵyp, kaıdzenge basyn burǵan qurylys kompanııalary boldy. Alaıda belgili bir ýaqyttan keıin izim-qaıyp joǵalyp kete bardy. Kún saıyn BI Group-tyń qyzmetkerli «qaıtsek ǵımarattardy sapalyraq salamyz?» dep bas qatyrady.

Kóz aldyńyzǵa kıiz úıdi elestetińizshi.  Shańyraqtyń bıik bolýy – ýyqtyń myqtylyǵyna tikeleı baılanysty. Shańyraq bıikke umtylǵanmen, ýyqtary álsiz bolsa, kıiz úıden qaraǵanda úndisterdiń vıgvamyna uqsap ketedi.

BI Group-tyń ýyǵy – onyń sapaly baspana turǵyzamyn degen nıeti».

О́z basym Almatynyń kóshelerin kezip jaıaý kóp júremin. Sondaǵy basty nazarym – Alataýda emes, Alataýǵa qarap boı túzegen ásem úılerde. «Myna úıdiń dızaıny erekshe eken», «biraq aýlasy tym tar eken», «balalar oınaıtyn alańy ádemi eken», «biraq úıdiń qabyrǵasy juqa sııaqty» degen oılardan-mazasyz suraqtardan mı ashıdy. Mıllıon qazaq ózim qojalyq etetin elý sharshy metrim bolsa eken dep armandaıdy. Olar úshin baspana – sán-saltanat emes, taza aýamen para-par ómirlik qajettilik.

О́z úıi, óleń tóseginde jatqan qazaq jaıly jatyp, ertesine jaqsy turýy árbir qurylys kompanııasy arqalaǵan amanat bolýy tıis.

Jazıra Baıdaly