• USD 468.56

  • EUR 497.56

  • RUB 7.3

  • CNY 67.18

29 Naýryz, 09:37:25
Almaty
+35°

20 Maýsym, 2019 Bıznes

Qyzdardy sulýlyqqa sıqyrlaǵan Zere qyzdyń qupııasy nede?

Ár adam sulýlyqty ártúrli kóredi, óz paıymdaýlaryna sáıkes qabyldaıdy.

Qas-kirpigiń qarlyǵashtyń qanatyndaı qap-qara,

Úlbiregen júziń seniń aq jibek pe, maqta ma?!

Ádemi teńeý, kóńilge qonymdy uıqas. Qyz sulýlyǵynyń ásemdigin Muqaǵalıdan asyryp eshkim jyrlamaǵan bolar. Tabıǵatynan bolmasa da, qarlyǵashtyń qanatyndaı qap-qara qas-kirpikti qyzdar búginde óte kóp. Árkim sulý bolýǵa umtylady, sulý jar súıgisi keledi. Jan sulýlyǵynan buryn tán sulýlyǵy birinshi kózge túsedi. Degenmen, ásemdik áleminde shekteý joq.

Búgingi taqyrybymyzǵa arqaý bolǵan keıipkerimiz sulýlyqtyń tabıǵı jolyn izdep, árbir arýǵa shynaıy qýanysh syılap keledi.

Jas kelse iske degen. Adamnyń qyzmetke ıkemi, bolashaqqa baǵdary jas talǵamaıdy. Isin dóńgeletip otyrǵan jas kásipkerlerdiń ózgelerge úlgi bolarlyq óz joly bar. Kishkentaı ǵana qyzyǵýshylyǵyn úlken iske aınaldyryp, Qazaqstanda joq kásiptiń tetigin tapqan arý «Zere Purebeauty» óndirisiniń negizin qalaýshy - Zere Serikqazy. Ol óz isin bastamas buryn ózge qyzdar sııaqty sulýlyqqa qushtar bolǵanyn jasyrmady. Aınaladaǵy sulýlyqtyń tabıǵı bolmysyn kóre bilgen 24 jastaǵy arý esh oılanbastan kádimgi qas-kirpik ósiretin maılardyń óndirisin bastap ketken.

 

Men de kez kelgen qyz sııaqty sulýlyqty izdedim

Ár adam sulýlyqty ártúrli kóredi, óz paıymdaýlaryna sáıkes qabyldaıdy. Men de ózge qyzdar sııaqty kirpik jalǵap, qas syzdyrýǵa qyzyqtym. Permanentti tatýaj jasatsam óz-ózime senimdi bolamyn dedim. Bul men úshin bir qıyn kezeń edi (Qyzdar qaýymy meni túsiner). Men de kez kelgen qyz sııaqty sulýlyqty izdedim. Ýaqyt óte kele eshqandaı kirpik jabystyryp, qas jasatpaı-aq, sulý bola alatynymdy túsindim. Bul jaǵdaıdy qalaı ózgertýge bolady dep kóp oılandym. Tabıǵı sulýlyǵymdy saqtaı otyryp ádemi bolýǵa talpyndym. Janymdaǵy tanys qyzdar da qas-kirpikterin ádemi etip jasatyp alatyn. Biraq bul qýanysh uzaqqa sozylmaıtyn. Arada ýaqyt ótken soń qas-kirpik juqaryp, kóńilge kirbiń túsiretin. О́ıtkeni qas-kirpikke de kútim kerek. Osylaısha men qas pen kirpiktiń tabıǵı bolmysyn saqtap ósýine septigin tıgizetin maılardy oılap tabýǵa kiristim. Sol kúnnen bastap kásibimdi damytýǵa jasaǵan alǵashqy qadamdarym bastalyp ketti.

Zere maslo

10 000 teńgeden bastalǵan kásiptiń násibi

Oǵan deıin men Eýrazııa ulttyq ýnıversıtetiniń Halyqaralyq qatynastar mamandyǵy boıynsha bilim aldym. 19 jasymnan bastap jumys istep, aıyna 200-300 myń teńge aılyq tabys taptym. Biraq aılyǵym jetkilikti bolsa da, jumysqa degen mahabbatym bolmady. О́z-ózime: «Sen osy jerde ne istep júrsiń?» degen suraqty jıi qoıdym.  

Sosyn esh oılanbastan jumystan shyǵyp kettim. Jarty jyldaı maılardyń barlyǵynyń quramyn oqyp, paıdasy men zııanyn anyqtadym. Basqa kompanııalar óndiretin maılardyń quramyn zerttedim. Qaltamda aqsham da bolǵan joq. Ata-anamnan 10 000 teńge surap, birinshi maılar men bótelkelerge tapsyrys berdim. Ary qaraı jumysqa qyzý kirisip kettim. Basynda birden tabys bolǵan joq. Tek jarty jyldan keıin kiris kire bastady. Men onyń barlyǵyn aınalymǵa jiberdim. «Zere Purebeauty» qas-kirpik, shash ósirýge arnalǵan maılar óndirisin búginde barynsha damytýǵa kúsh salyp jatyrmyz.

Zere Maılary

Qyzmetkerlerimniń sany az bolsa da, jumys sapasy óte joǵary bolǵanyn qalaımyn

«Zere Purebeauty» óndiretin maılar óte tabıǵı, hımıkattardy, garmondardy paıdalanbaımyz. Maılarǵa qajetti sapaly shıkizattardy Ýkraınadan, Eýropadan tapsyrys berip aldyrtamyz. Olardyń eshqandaı zııany joq. Eń bastysy, tutynýshynyń keıbir komponentterge allergııasy bolmasa boldy. Áleýmettik jelidegi paraqshamyzda maılardyń quramy týraly tolyq aqparat jarııalaımyz. Kez kelgen tutynýshy tolyq aqparatty sol jerden oqyp, tanysa alady. «Zere Purebeauty» óndirisinde qasqa, kirpikke, shashqa arnalǵan maılar, tabıǵı zattardan jasalǵan sabyn bar.

Bul qazir bizdiń otbasylyq kásibimiz. 3 jyldan beri osy jumyspen aınalysyp kelemiz. Maǵan anam, baýyrym kómektesedi. Árbir qyzdyń tabıǵı sulý bolyp, ózderine degen senimdiligin arttyrý úshin komandamyzda 6 adam jumys isteıdi. О́z komandamnyń úlken bolýyna talpynǵan joqpyn. Men bolmysymnan sanǵa emes, sapaǵa mán beretin janmyn. Qyzmetkerlerimniń sany az bolsa da, jumys sapasy óte joǵary bolǵanyn qalaımyn. Qyzmet kórsetý deńgeıi týraly kóp oılanamyn. О́zim de tutynýshy retinde kóbine qyzmet sapasyna, menimen qalaı sóıleskenine mán beremin. О́kinishke qaraı, bizdiń elimizdegi qyzmet kórsetý deńgeıi keremet jaǵdaıda emes. Ár nárseni ózimizden bastaýymyz kerek emes pe? Sol sebepti, qaramaǵymda 5 adam jumys istese de, qyzmet kórsetýimiz joǵary deńgeıde bolady degen maqsat qoıdym. О́ziniń qaıda baratynyn, ne bolaryn bilmeıtin 100 adamnan turatyn komandaǵa qaraǵanda óz isin shyn súıip isteıtin 5 adam naǵyz maman bolyp shyǵady.

Meniń de mýzam bar

Men de shyǵarmashylyq adamymyn. Meniń de óz mýzam bar. Adamdardyń adamgershiliginen, olardyń áserli áńgimelerinen shabyttanamyn. Men jaqsy jerlerde bolǵandy, saıahattaǵandy jaqsy kóremin. Men úshin árbir saıahat - jańa beles. Ár adam óz ómiriniń irgesin jaqsy kórgen adamdarymen, oqyǵan kitaptarymen, umytylmas saıahattarmen jáne tátti esteliktermen qalaıdy. Barlyq kerek emes oılardan arylý kerek, seniń jas janyń adaldyq pen jaqsylyqty ǵana sezinsin. О́tken ómirge qaraýdyń qajeti joq. Bolǵan iske ókinbe. Batyl bol, ózińe shynshyl bol!

Siz yńǵaılylyq pen sulýlyqtyń qaısysyn tańdar edińiz? О́zgelerdiń meni qabyldaýyn  kútkendikten tar aıaq kıim kııýge daıyn adamdardyń qatarynan boldym. Meni sulý adam retinde qabyldaǵandaryn qaladym. Bul jaı ǵana ómir súrý salty. О́zgelerdiń seni myqty, sulý, erekshe adam dep oılaýy úshin barlyǵyn jasaısyń. Biraq barlyǵy olaı emes. Osyny túsingennen keıin yńǵaılylyqty birinshi orynǵa qoıatyn boldym.

 

Toqta! Tereń tynysta! О́mir ǵajap!

Kópbalaly otbasynda tárbıelengen qyzbyn. Úıde 5 balamyz. Men ata-anammen birge shetelde demalyp kórgen emespin. О́kinishke qaraı, meniń ata-anamnyń ondaı múmkindigi bolǵan joq. Alaıda men ata-anamnyń ózgelerge jasaǵan jaqsylyǵyn kórip óstim. Olar bizdi ózgeshe etip tárbıeledi. О́zim aqsha taba bastaǵannan keıin saıahattaýdy bastadym. Alǵash ret Túrkııaǵa qurbymmen bardym. Halyqaralyq konferensııaǵa qatystyq, bir jaǵynan saıahattap qaıttyq. Bul meniń ómirimdegi óte jarqyn sát boldy. Men alǵash ret ózge álemdi kórdim.

Bala kezimde kóp saıahattamaǵandyqtan bul men úshin jańa bir beles edi. Sońǵy jarty jyldyń ishinde 5 elde boldym. Jańa adamdarmen tanysqandy, olardyń qalaı ómir súretinin baqylaǵandy jaqsy kóremin. Olardyń jaqsy qasıetterin boıyma darytýǵa tyrysamyn. Eń bir jarqyn saıahattardyń biri Barselonaǵa boldy. Men aýyryp, dene qyzýym 40 gradýs bolyp tursa da, jumys isteı beremin. Toqtaýdy bilmeımin. Barselonada júrip, arasynda toqtaý kerektigin, ómirdiń keıbir sátterin tynyshtyqpen ótkizgenniń durys ekenin túsindim. Bir jerge ómir boıy júgirip, asyǵyp júrýdiń qajeti joq. Toqta! Tereń tynysta! О́mir ǵajap!

Zere maılary

«Kitap» atty qudiretti álemniń bólshegine aınaldym

Men kitap oqýdy asa unatpaıtynmyn. Biraq boıymdaǵy kitapqa degen mahabbatty oıatýǵa tyrystym. Sóıtip, 10 synyptan bastap kitap atty qudiretti álemniń bir bólshegine aınaldym. Uıqysyz túnderim bastaldy. Túnimen kitap oqıtynmyn. Biraq bir jyl, jarty jyldan keıin oqyǵandarymdy umytyp qala beretin boldym. Sol sebepti osy jyldan bastap men kúndelik júrgizýdi qolǵa aldym. Barlyǵyn sol jerge jazyp otyramyn. Kitaptan alǵan áserimdi, oılardy sol jerge tizbektep teremin. Odan beri kitaptyń maǵynasyna tolyq boıladym desem bolady. Meniń berer keńesim, oqyǵanyńyzdy mindetti túrde túrtip júrińiz. Kitaptaǵy kilt sózderdi jazsańyz, ol eshqashan umytylmaıdy. Tek osylaı ǵana oqyǵanyńyzdy kóńilge toqýyńyzǵa bolady.

Zere maılary

Kún saıyn alǵa umtylýdy oılaımyn

Bizde de jumysymyz júrmeı, isimiz keri ketetin kezder bolady. Keıde bizdiń ónimdi tutynýshylardyń ishinde minezi óte aýyr adamdar kezdesedi jáne meniń olarmen sóılesýge tájirıbem jetpeı jatady. Meniń de ishki jan dúnıemde qorqynysh sezimi bar. Biraq kún saıyn men tek alǵa qaraı umtylýdy oılaımyn. Ár kúni, árbir mınýt saıyn men júregimniń únine qulaq túremin. Meniń boıymdaǵy tasyǵan energııany qaıdan alatynymdy bilmeımin. Biraq tańerteńnen keshke deıin kezdesýler men jınalystardyń ortasynda júrip barlyǵyna úlgerýge tyrysamyn.

Turmysqa shyqqanyma jarty aı ǵana boldy. Men qazir óz qundylyqtarymdy, oıymdy ózgertip jatyrmyn. Bir shańyraqqa kelin bolyp túskennen keıin meniń óz mindetterim bar. Men boı túzeıtin minsiz áıelder týraly aıtatyn bolsam, Irına Hakamadovanyń, Anastasııa Mıronovanyń, Tına Kandelakıdiń eńbek joldaryn úlgi tutamyn. Meniń oıymsha, tabysty áıel óziniń isi bar, ózin jaqsy kóretin, ózine kóńil bóletin, aınalasyndaǵy álemdi jadyratyp merekege aınaldyrady. Júregi názik, otbasyn shattyqqa bóleıdi.

Men árbir kúnimniń este qalarlyqtaı ótkenin qalaımyn. Aınalamdy keremet adamdar qorshaǵanyn, ómirimniń ár sáti qýanyshty bolǵanyn tileımin. О́zgelerge paıdaly dúnıe jasaǵym keledi. Qoǵamǵa paıdaly, deni saý, aqyldy urpaq tárbıelegim keledi. Júrgen jerimde paıdaly bolǵanymdy qalaımyn.

Suhbattasqan Marjan Sábet

Marzhan Sabet

Avtormen onyń Facebook paraqshasy arqyly habarlasýǵa bolady.

Jazylyńyz

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir