Pedofıldiń qurbany bolǵan 16 jastaǵy qyz óz-ózine qol saldy

Pedofıldiń qurbany bolǵan 16 jastaǵy qyz óz-ózine qol saldy dep jazady Qamshy.kz aqparat agenttigi Eýrazııa birinshi arnasynyń deregin negizge alyp. Boıjetkenniń mundaı qadamǵa barýyna ózin zorlamaq bolǵan jigitke qatysty qylmystyq istiń toqtatylýy sebep bolǵan.  

16 jastaǵy qyz 9 maýsymda sýısıd jasady. Úsh kúnnen soń qaıtys boldy. Sodan beri qaıǵydan qan jutqan anasy kúndiz kúlkiden, túnde uıqydan aıyrylǵan. Bári ótken jyldyń qyrkúıek aıynan bastalypty. Qyzyn týǵan kúnge shaqyrǵan 19-daǵy tanys jigiti ony zorlaýǵa árekettengen. Eń soraqysy, álgi jigit estradaǵa endi-endi qadam basyp jatqan jas ánshi kórinedi.

"Balamdy qorǵaı almaı qaldym. Sizder bizdi qalaı qorlaǵandy bilmeısizder de. Qyzym bolǵan jaǵdaıdy baıandap bergende, men ózimdi qalaı sezingenimdi sizderge aıtyp jetkize almaımyn. Sol jigiti qyzymdy jedelsatyǵa kúshtep aparyp, zorlamaq bolǵan. Biraq, ol qarsylasyp, ebin taýyp qashyp ketken" , - dedi marqum qyzdyń anasy Álııa Orazbaeva.

Bul jaǵdaıdan keıin jasóspirim úlken kúızeliske ushyraǵan. Anasynyń shaǵym túsireıik degen úndneýine ol "jamantty bolmaıyq" dep qarsylyq tanytqan. Biraq, balasynyń abyroıyn tókpek bolǵan jigittiń isine shamdanǵan anasy aıtqanynan qaıtpaı qoıǵan.

"Qylmystyq kodekstiń 122-shi baby boıynsha is qozǵaldy. Iаǵnı, qyz ben jigittiń arasynda bári ózara kelisimmen bolǵan degendi meńzeıdi. Muny qalaı túsinýge bolady? Qyz tergeýshilerge bergen túsiniktemesinde onyń ýysynan sytylyp shyǵý úshin qalaı jantalasqanyn aıtyp bergen. Al jigit bolsa ony lıftiden shyǵarmaýǵa tyrysqan" , - dedi "Ne molchı KZ" qoǵamdyq uıymynyń jetekshisi Dına Smaılova.

Alaıda oqıǵaǵa qatysty qozǵalǵan qylmystyq is tym uzaqqa sozylyp, aqyr-sońy jabylyp tynǵan. Istiń jabylǵanyn estip, ábden qorlanyp, júıkesi syr bergen jasóspirim Almaty oblysynyń aýmaǵynda óz-ózine qol salǵan. Osydan keıin aımaq polıseıleri basqa bap boıynsha isti qaıta ashypty.

"Kámelettik jasqa tolmaǵan qyzdyń qaıtys bolýyna baılanysty qylmystyq is qozǵaldy. Qazirgi ýaqytta osy derekke qatysty Qylmystyq kodekstiń 105 babyna sáıkes, óz-ózin óltirýge jetkizý deregi boıynsha sotqa deıingi tergeý amaldarymen, Ile aýdandyq polısııasy aınalysýda. Aıta ketý kerek Almaty oblystyq polısııa departamenti osy tergeý isin óz baqylaýyna aldy" , - dedi Almaty oblystyq polısııa departamentiniń resmı ókili Serik Úpıev.