Atyraýda janashyr jandar kópbalaly anaǵa úı salyp berdi (+FOTO)

Jańa baspanany Atyraýdyń janashyr turǵyndary úsh aı ishinde salyp bitirdi. Bul úı Meıramgúl Ámirǵalıeva men onyń tórt balasyna arnalǵan. Úıdiń jalpy aýmaǵy – 105 sharshy metr.

«Baspanany jyldyń basynda – aqpan aıynda turǵyza bastadyq. Kópbalaly anaǵa kómek retinde aqsha jınaýǵa tek Atyraý óńiri ǵana emes, Qazaqstannyń basqa da aımaqtarynyń halqy zor úles qosty. Qurylys materıaldaryn alýǵa jergilikti kásipkerler kómektesti. Úı tolyǵymen otandyq qurylys materıaldarynan salynǵan. Úıdiń ishi keń, jyly, jaryq, barlyq ınjenerlik kommýnıkasııa jetkizilgen, qujattary bar. Biz, sonymen qatar, qajetti jıhaz ben turmystyq tehnıkany da satyp áperdik. Endi tek úıdiń aınalasyn qorshaý ǵana qaldy. Qazirgi tańda aqsha jınaýdy toqtattyq», – deıdi jergilikti kásipker Ashat Baǵyt.

Osy ýaqytqa deıin Meıramgúl balalarymen birge jaldamaly shaǵyn úıde turyp keldi.

«Jumysqa shyǵa almaımyn, óıtkeni úlken ulym múgedek. Kishkentaı kúninde sal aýrýyna shaldyqqan. Oǵan jan-jaqty kútim kerek. Odan kishi balalarym mektepte oqıdy. Múgedek balany qarap otyrǵanym úshin memleketten járdemaqy alamyn, sondaı-aq, kópbalaly ana retinde alatyn járdemaqym bar – barlyǵyn qosqanda tabysym 80 myń teńgeden aspaıdy. Burynǵy kúıeýim aýrý, bizge kómektesetin shamasy joq. Aqsha jınap, jańa úı turǵyzýǵa úles qosqan barsha jandarǵa alǵysym sheksiz», – deıdi Meıramgúl Ámirǵalıeva.

Atyraý ákiminiń orynbasary Ulyqbek Tinálıevtiń sózinshe, búginde aımaqta kópbalaly analarǵa memleket qana emes, jalpy, qoǵam ókilderi – mesenattar, volonterler jáne kásipkerler de erekshe kóńil bólip otyr. Atyraýdyń janashyr turǵyndary kópbalaly anaǵa úı salyp berdi Atyraýda 1088 – «Altyn alqa», 1559 – «Kúmis alqa» ıegeri turady. Jalpy, óńirde tórt baladan artyq perzent tárbıelep otyrǵan 5296 ana bar.