Nazarbaeva Chehııadan ınvestısııa suraýda

QR parlamenti senatynyń tóraǵasy Darıǵa Nazarbaeva Chehııanyń Qazaqstandaǵy elshisi R.Gıkldy qabyldady dep habarlaıdy Qamshy.kz aqparat agenttigi Senattyń baspasóz qyzmetine silteme jasap.  

Senat tóraǵasy Chehııa Qazaqstannyń burynǵy dosy, Eýropa Odaǵyndaǵy mańyzdy saıası jáne ekonomıkalyq áriptesi ekenin atap ótti. Darıǵa Nazarbaeva Qazaqstandaǵy mańyzdy ishki saıası oqıǵalar, júrgizilip jatqan reformalar men kezekten tys prezıdent saılaýynyń nátıjeleri týraly áńgimeledi.  

“Qazaqstan Prezıdenti Qasym-Jomart Toqaev laıyqty ári nyq jeńiske qol jetkizdi. Bizdiń aldymyzda úlken mindetter tur. Elbasynyń strategııalyq baǵytyn iske asyrý – basty baǵytymyz”, - dedi ol.  

Senat Tóraǵasy elimizdiń ishindegi jáne halyqaralyq keńistiktegi beıbitshilikti, pikirlesýdi, turaqtylyqty nyǵaıtýǵa baǵyttalǵan Qazaqstannyń halyqaralyq bastamalaryn qoldaǵany úshin Chehııaǵa rızashylyǵyn bildirdi. Taraptar eki el parlamentshileriniń arasyndaǵy yntymaqtastyqty tereńdetýdi jaqtaıtyndaryn aıtty.  

“Bizdiń elderimizdiń Parlamentterinde qurylǵan yntymaqtastyq toptarynyń ózara is-qımylyn damyta túsý qajet. Adamdar arasyndaǵy baılanys – dıplomatııanyń eń jaqsy túri”, - dep atap ótti Parlament joǵarǵy palatasynyń basshysy.  

Darıǵa Nazarbaeva chehııalyq kompanııalardyń Qytaı men EAEO elderine taýar tasymalynyń múmkindikteri týraly aıta kelip, Chehııa kásipkerlerin Qazaqstanǵa ınvestısııa salýǵa shaqyrdy. Senat basshysynyń pikirinshe, avtomobıl jasaý, jasyl tehnologııalar, bilim berý, densaýlyq saqtaý jáne týrızm yntymaqtastyqtyń basym salalary bolyp tabylady.  

“Qazaqstanda artyqshylyqtar men múmkindikter óte kóp. Aımaq óte belsendi damyp keledi”, - dedi Senat basshysy.  

R.Gıkl bizdiń elimizdiń qaqtyǵystardy retteý jónindegi bitimgershilik kúsh-jigeri men ekijaqty yntymaqtastyqtyń zor áleýetin atap óte kelip Qazaqstanda júzege asyp jatqan reformalarǵa nazar aýdardy.