Saýytbek Ábdirahmanov: Toqaev Ulttyq qoǵamdyq senim keńesin narazylyq sherýinen keıin qurǵaly jatqan joq

Májilis depýtaty Saýytbek Ábdirahmanov áleýmettik jelilerde taraǵan jańsaq pikirge qatysty túsinikteme berdi, dep habarlaıdy Qamshy.kz aqparat agenttigi Sputnik Qazaqstan tilshisine silteme jasap.

Memleket basshysy bul bastama jaıly óziniń saılaýaldy baǵdarlamasynda aıtyp qoıǵan bolatyn. Depýtat qazaqstandyqtardyń prezıdent saılaýyna belsendi qatysyp, tarıhı tańdaý jasaǵanyn atap ótti.

"Saılaýǵa daýys berý quqyǵy bar adamdardyń 80%-niń qatysýy, olardyń bir adamǵa 70% daýys berýi órkenıetti álemde, demokratııaly qoǵamda joǵary kórsetkish bolyp sanalady. Dese de tolǵandyratyn jekelegen máseleler bar. Máselen, Toqaevtyń negizgi opponenti 17% daýys jınady. Al bul 1 mıllıon 495 myń saılaýshy – bir jarym mıllıonǵa jýyq adam. Menińshe, bul kóp emes, biraq az da emes. Siz ben biz bul saılaýshylardyń naqty bir kandıdatty qoldap nemese naqty bir kandıdatqa qarsy daýys bermegenin bilemiz. Olar, negizinen, ózderin basqaratyn adamdarǵa degen seniminiń joqtyǵynan osylaı daýys berdi", - dedi Ábdirahmanov májilistegi QHA depýtattarynyń otyrysynda.

Májilismen qazirgi mindet bıliktiń halyq aldyndaǵy jaýapkershiligin arttyrý ekenin naqtylap aıtty.

"Qoǵamdyq senim daǵdarysy, mine, bizdi qazir osy másele alańdatýy tıis. Dál osy qoǵamdyq senim daǵdarysynan qoǵamdyq kóńil-kúıdiń radıkaldanýy oryn alyp otyr. Kóńil-kúıdiń radıkaldanýynyń basty sebebi – saıası pikirtalastaǵy mádenıettiń joqtyǵynan. Mine, Toqaev osy sebepten Ulttyq qoǵamdyq senim keńesin qurǵaly jatyr", - dedi ol.

Osy oraıda Ábdirahmanov áleýmettik jelilerde Toqaevtyń bastamasyna qatysty taraǵan jańsaq pikirge toqtaldy.

"Aıtpaqshy, qazir áleýmettik jelilerde keıbir bilgishter Qasym-Jomart Toqaev bul keńesti kóshelerdegi narazylyq sherýlerden keıin qurǵaly jatyr aıtyp jatyr. Tipti olaı emes!", - dedi depýtat.

Ol ulttyq keńes qurý jaıly Toqaevtyń saılaýaldy baǵdarlamasynda taıǵa tańba basqandaı jazylǵanyn aıtty. Osydan keıin saılaýaldy tuǵyrnamadan úzindi keltirdi.

"Men qoǵamdyq senim ulttyq keńesin qurýdy jón kórdim. Ulttyq keńeske bizdiń qoǵamnyń qabiletti ókilderi kiretin bolady. Osy keńes aıasynda mańyzdy jalpyulttyq zań jobalary men damý baǵdarlamalaryna qoǵamdyq saraptama júrgizetin bolamyz", - dep oqyp berdi Ábdirahmanov.