Aıbek Nuǵymarov álemdik Gran-Prı ıegeri atandy

Barqytbeldiń baýraıynda dúbirli toı ótip, tól ónerimiz tórge ozǵan kún boldy. Jýyqta ǵana eki dúrkin «Qazaqstan barysy» atanǵan Shyǵystyń bas balýany Aıbek Nuǵymarov endi mine Yrǵyzbaı Dosqanauly atyndaǵy álemdik Gran-Prıdi jeńip aldy dep habarlaıdy Qamshy.kz aqparat agenttigi.

Maýsym aıynyń 14-16 kúnderi Shyǵys Qazaqstan oblysynyń Tarbaǵataı aýdanynda «Tuǵyry bıik Tarbaǵataı» atty festıval ótti. Festıval aıasynda qazaq kúresinen Yrǵyzbaı Dosqanauly atyndaǵy álemdik Gran-Prı týrnıri uıymdastyryldy. Osymen jetinshi márte jalaýyn jelbiretken bilektiler básekesine dúnıejúziniń otyzǵa tarta elinen 90 balýan qatysyp, úsh salmaq dárejesi boıynsha ózara myqtyny anyqtady.

Eń aldymen bozkilemge 70 keli tartatyn balýandar shyqty. Jeńil salmaqtaǵy sportshylar arasynda qola júldege Moldavııa eliniń namysyn qorǵaǵan Geordje Roký qol jetkizse, kúmis medal otandasymyz О́sken Tóleýbekovtiń enshisine buıyrdy. Al osy salmaqtaǵy altyn medal grýzııalyq bozkilem sheberi Zvıad Odosheshvılıdiń keýdesinde jarqyrady.

Sol sııaqty 80 keli salmaqtaǵy básekede úshinshi oryndy qazaqstandyq Bekzat Manasbaev ıelense, kúmis júlde grýzın Kaha Momýlashvılıge buıyrdy. Bul salmaqtaǵy birinshi oryndy Tájikstan sportshysy Hamroz Radjabo jeńip aldy.

Bárinen de 80 keliden joǵary salmaqtaǵy alyptardyń beldesýi qyzyqty boldy. Fınalǵa shyqqan qos myqty Aıbek Nuǵymarov pen ózbek balýany Mýhsın Hısomýdınov jankúıerler delebesin qozdyrǵan asa tartysty beldesý ótkizdi. Degenmen qıqýǵa qıqý qosqan qalyń jankúıerdiń qoldaýy rýhtandyrmaı qoısyn ba?! Namysy qozyp, jigeri tasyǵan Aıbek balýan qarsylasyn upaı aıyrmashylyǵymen utyp, osy týrnırdiń túıe balýany atandy. Kúmis medaldi ózbekstandyq Mýhsın Hısomýdınov mise tutsa, grýzııalyq Geordjı Kataradzege buıyrǵany qola boldy.

- Shyǵysqa, onyń ishinde Aqsýattaı aýylǵa álemniń otyzǵa tarta elinen sportshylar kelýi úlken jetistik. Iá, qazaq kúresi jyldan-jylǵa tanymal bolyp keledi. Bul qýanarlyq jaıt. Osy joly baǵym janyp álemdik Gran-Prıdi ıelendim. Qarsylastarym da osal bolǵan joq árıne, – deıdi týrnır jeńimpazy Aıbek Nuǵymarov.