Stýdentter Aqtaýdaǵy kásipkerler palatasynda qonaqta boldy

Mańǵystaý týrızm kolledjiniń stýdentteri, bolashaq marketologtar Aqtaýdaǵy óńirlik kásipkerler palatasyna ekskýrsııaǵa bardy. 1-kýrsty támámdaǵan tálimgerler jyl boıy jalpy pánder boıynsha bilim alyp, endi bir aptalyq oqý tájirıbesinen ótýde. Jastardy negizinen kásipti qalaı ashýǵa bolady? Kompanııa marketıngi qalaı jasalady? Bızneske qarajat alý joldary men sertıfıkattaý sııaqty suraqtar kóbirek qyzyqtyrdy.

«Meniń anam 20 jyldan beri kásipker. Ortalyq bazarda saýda-sattyqpen aınalysady. О́zim marketolog mamandyǵyn tańdap keldim. Anam sııaqty ýaqyt óte kele kásiptiń qyr-syryn úırengen emes, marketıngitiń barlyq ádisterin ıgergen bilikti maman bolǵym keledi. Bolashaǵymdy jarqyn bolsyn dep bar yntammen bilim alyp júrmin» – deıdi stýdent Laýra Ýbaıdýllaeva.

Kásipkerler palatasynyń bilikti mamandary stýdentterdiń barlyq suraqtaryna jaýap berdi.

«Aýyldyq jerlerde bıznes ashqysy keletin kásipkerler sany kóbeıip keledi. Tabıǵı ónim óndirip, oǵan tıisti sertıfıkattar men ruqsatnama berý, paıda men shyǵyndy tarazylaý, oǵan otandyq ónim degen ataý berý syndy túrli qyzmetterdi kásipkerler palatasynan alýǵa bolady. Barlyq qyzmet túrin shalǵaı aýyldan áýre-sarsańǵa túsip ortalyqqa kelmeı, úıden shyqpaı-aq elektrondy túrde alatyn boldy. Eger kózbe-kóz keńesemin dese, keńesshiler men marketıng mamandar, zańgerler konsýltasııalyq qyzmet kórsetýge daıyn», – deıdi О́KP Adamı kapıtaldy damytý bóliminiń basshysy Rıma Qurmanǵazıeva.

 «Bıyl jalpy pán óttik, endi jańa oqý jylynda arnaı pánge aýysamyz. Sondyqtan da óz mamandyqtaryna degen qyzyǵýshylyǵyn oıatý, stýdentterdiń kontıngentin turaqty ustaý maqsatynda Palataǵy saıahat uıymdastyrdyq. Mamandyqqa kirispe, bıznes ıdeıany damytý úshin kolledjdiń ár kýrsynda «Kásipkerlik negizderi» páni qosyldy. Osynyń bárin tájirıbe júzinde kórýge jaǵdaı jasap otyrmyz. Shákirtterimizge bári unap jatyr», – deıdi Mańǵystaý týrızm kolledjiniń oqytýshysy  Gúljan Sydyqova.

Stýdentter kásipkerler palatasynyń barlyq bólimderin aralap shyqty. Ustazdary men stýdentter alda da úzbeı kelip turýǵa ýaǵdalasty.