Qazaqstan 12 jyldyq bilim júıesine qashan kóshedi?: Eks-mınıstr Shámshıdınova málimdeme jasady

Burynǵy Bilim jáne ǵylym mınıstri Kúlásh Shámshıdınova Qazaqstan halqy 2021-2022 oqý jylynda 12 jyldyq bilim júıesine tolyq kóshetinin málimdedi dep habarlaıdy Qamshy.kz aqparat agenttigi Hola News saıtyna silteme jasap. 

Mınıstrdiń aıtýynsha, 12-jyldyq bilim berýdi engizý 2021-2022 oqý jylyna josparlanyp otyr.

"Respýblıkada 2016 jyldan bastap 1, 2, 3, 4, 5, 6, 7 jáne 8 synyptarda "Nazarbaev" zııatkerlik mektepteri tájirıbesine sáıkes ázirlengen orta bilim berýdiń jańartylǵan mazmuny engizildi. 2019-2020 oqý jylynda jańartylǵan bilim berý mazmunyna 4, 9 jáne 10 synyptar, al 2020-2021 oqý jylynda 11 synyp kóshetin bolady. 2021 jyly bilim berýdiń jańartylǵan mazmuny tolyqtaı engizilgennen keıin 12-jyldyq bilim berýge kezeń-kezeńimen kóshý josparlanǵan", - dep aıtty Shámshıdınova.

Qazirgi tańda 12 jyldyq bilim berýge kóshý qurylymy Qazaqstandaǵy bilim men ǵylymdy damytý memlekettik baǵdarlamasynyń jobasyna engizilgen.

"12-jyldyq bilim berýdi engizý 2021-2022 oqý jylyna josparlanyp otyr. Qazaqstandaǵy bilim men ǵylymdy damytý memlekettik baǵdarlamasy bekitilgennen keıin memlekettik jalpyǵa mindetti bilim standarttary men oqý josparlaryna tıisti ózgertýler engiziledi", - dedi K.Shámshıdınova.