Toqaev: Úsh jarym jyl buryn ol maǵan "kelesi prezıdent sen bolasyń" dedi (vıdeo)

Qazaqstan prezıdenti Qasym-Jomart Toqaev óziniń prezıdent bolatyny týraly úsh jyl buryn bilgenin aıtty dep jazady Qamshy.kz aqparat agenttigi euronews.com saıtyna silteme jasap.

Bul týraly Toqaev  Euronews-tiń "Globalnyı dıalog" baǵdarlamasyna bergen suhbatynda aıtty.

"Úsh jarym jyl buryn ol (red. Qazaqstannyń alǵashqy prezıdenti N.Nazarbaev) maǵan "kelesi prezıdent sen bolasyń" dedi. Ýaqyt óte kele biz ońtaıly sátti tańdadyq", – dedi Toqaev. 

Qazaqstan memleketiniń negizin qalaýshy – Nursultan Nazarbaev

Toqaevtyń aıtýynsha, Astana atyn Nur-Sultanǵa aýystyrý týraly sheshimi – Qazaqstan memleketiniń negizin Nursultan Nazarbaevtyń qalaǵandyǵymen baılanysty.

"Nursultan Nazarbaevqa kelsek, ol – bizdiń memleketimizdiń negizin qalaýshy tulǵa. Ol aldaǵy ýaqytta da saıasatta qala beredi. Onymen strategııalyq máseleler boıynsha keńesip otyrý kerek dep esepteımin jáne únemi solaı jasap júrmin. Nursultan Nazarbaevtyń aıtýynsha, Qazaqstanda eki jaqty bılik bolmaıdy, ol bılikten ketedi. Biraq prezıdentke kómektesedi. Prezıdentke qansha ýaqytqa deıin kómetesetini onyń ózine baılanysty", – dedi Toqaev.

Ádil saılaý hám halyqtyń narazylyǵy

Sonymen qatar Qazaqstan prezıdenti sońǵy ýaqytta halyqtyń narazylyq bildirip kóshege shyǵýyna qatysty oıyn aıtty.

Toqaevtyń aıtýynsha, alańǵa narazylyǵyn bildirip shyqqan adamdardyń talaptary tyńdalady.

"Olar shynymen narazylyqtaryn bildirip kóshege shyqty. Olardyń talaptaryn taldaý jumystary júrgizilýde. Negizinen narazylardyń talaby áleýmettik baǵytqa baılanysty. Meniń mindetim – bul talaptardy taldaý. Kóshege shyqqan adamdardy tyńdaý kerek. Men bılik pen halyq arasyndaǵy dıalogty ornatý qajet dep esepteımin. Osy maqsatta men qoǵamdyq senim keńesin qurdym", – dedi Toqaev.

Toqaev "saılaý ádiletsiz ótti" dep kóshege shyqqandar bosatylatyn aıtty. 

"Árıne, olar bosatylady, óıtkeni olardyń oıynsha saılaý ádiletsiz ótken. Men, mysaly, saılaý bastan-aıaq ádil ótti dep esepteımin", – dedi Toqaev.

Sondaı-aq suhbat barysynda Toqaev Qytaı men AQSh arasyndaǵy "saýda soǵysyna", Reseı men Qazaqstan arasyndaǵy baılanysqa, Qazaqstandaǵy birqatar máselelerge qatysty oıyn aıtty.

Qazaqstandy 30 jylǵa jýyq basqarǵan Nursultan Nazarbaev 2019 jyldyń 19 naýryzynda prezıdenttik ókilettiligin toqtatatyny týraly úndeý jarııalady. Sodan keıin zańǵa sáıkes senat spıkeri Qasym-Jomart Toqaev Qazaqstan prezıdenti laýazymyn ýaqytsha ıelendi. Ol 9 maýsymda ótken kezekten tys prezıdent saılaýynda jeńiske jetip, resmı túrde Qazaqstannyń ekinshi prezıdenti boldy. Biraq áleýmettik jeli de kóptegen adamdar Toqaevtyń jeńisin moıyndamaı, saılaý ádiletsiz ótkenin aıtty. El astanasy Nur-Sultanda jáne Almaty qalasynda saılaý zańsyz dep tanyǵan myńdaǵan adamdar kóshege shyǵyp, óz narazylyqtaryn bildirdi. Olardy polısııa jáne arnaıy jasaq ustady.