Rınat Zaıtov: Bári jaqsy, alańdamańyzdar! (vıdeo)

Aıtysker aqyn Rınat Zaıtov Instagram paraqshasyna vıdeo júktep, Semeıde ekenin aıtty dep jazady Qamshy.kz aqparat agenttigi. 

"Bireýler "Rınat mıtıngige shaqyryp júr" dep shýlatyp júr deıdi. Qurmetti aǵaıyn, men basynda da aıtqanmyn, qazir de aıtamyn, men eshqashan bir ózgeristi adamdardyń qan tógisimen jasamaımyn. Sondyqtan bárińiz aman-saý bolyńyzdar. Sizderge aıtar zor alǵysym bar. Qudaı qalasa, bir-eki kún demalyp, óz-ózime kelip alaıynshy. Bireýlerdiń yryń-jyryń bos áńgimelerine ere bermeńizdershi",- dedi Zaıtov ınstagramdaǵy vıdeosynda. 

Esterińizge sala keteıik, aıtysker aqyn Rınat Zaıtov 10 maýsymda kezekten tys prezıdent saılaýynyń nátıjesimen kelispeıtinin aıtyp, bir top baqylaýshylarmen birge Almatydaǵy "Alataý" dástúrli óner teatrynyń aldyna jınalǵan. Ol halyqtan saılaýda "Ámirjan Qosanovty qoldaıyq" dep aıtqany úshin keshirim surap, aldaǵy ýaqytta partııa qurǵysy keletinin aıta bastaǵanda polısııa men arnaıy jasaq jınalǵandardy jappaı ustady. Ustalǵandardyń arasynda Zaıtovta boldy.

Biraq birshama ýaqyttan keıin aqyn Youtube jelisindegi arnasy arqyly ózin polısııa bosatqanyn aıtyp vıdeo taratty.

500-ge jýyq adam Zaıtovty "óz kózimizben kórmesek, bosatylǵanyna senbeımiz" dep Almaty polısııa departamentiniń aldyna jınaldy. Rınat Zaıtov jınalǵandardyń arasyna ózi kelip, tarqaýǵa shaqyrdy.

♦Oqı otyryńyzdar: Júrsin Erman: Rınattyń qaıda ekenin ózim de bilmeımin