Marǵulan Seısembaı: 3-5 aı ishinde saıası reforma jasalmasa, xalyqty eshkim toqtata almaıdy

Dostar, keshe QR prezıdentiniń saılaýy ótti. Men kóp jyldan beri saılaýlarǵa jáı ǵana kúáger retinde qatysyp júrdim. Meniń/sizderdiń nemquraılyǵym biz negizgi demokratııalyq qundylyqtardan aıyrylǵanymyzǵa ákelip soqty. Men buryn saılaýdyń jalǵandyǵy, ádiletsizdigi týraly kóp estıtinmin. Biraq meniń ózimniń oǵan kózim jetpegendikten, oǵan ishki senimdilik bolmaǵandyqtan men úndemedim.
Bul joly men bárin óz kózimmen kórip óz-ózime eń mańyzdy suraqqa jaýap tapqym keldi. Ol suraq - osy saılaý júıesi halyqtyń talabyn durys jetkize me joq pa? Ol úshin men táýelsiz baqylaýshy bolyp tirkelip ózim senetin adamdardy da baqylaýshy bolýǵa shaqyrdym. 
Meniń 494 ýchaskemde bári keremet ári móldir túrde ótti. Men barlyq jerge basymdy suǵyp bárin tekserdim. Tańǵy saǵat 5-50-ten túngi saǵat 23-16-ǵa deıin bárin tolyqtaı baqyladym. Ýchaske men seıfti ashqanda bıýlleten sanyn ózimiz sanap aldyq. Kún bitkende qoldanbaǵan bıýlletenderdi joıdyq. Barlyq berilgen daýystardy muqııat sanadyq. Artyq bıýlleten syrttan tastalǵan joq. Bes adam ǵana ózderiniń daýystaryn fotoǵa túsirip ózderiniń basshylaryna jiberdi. Mende meni arnaıy tynysh ýchaskege jiberdi degen kúdik týdy. Meniń ýchaskemniń daýys berý ýderisiniń ádilettigine men 99,99% kepil bere alamyn. Tómengi fotoda meniń 494 ýchaskemniń nátıjesi birinshi bolyp tur. 
Men taǵy da 5 votsap baqylaýshylar toptarynda tirkelgen soń, men olardyń ishinen ózimniń senetin baqylaýshylarym bar 19 ýchaskeleriniń nátıjesin alyp saraptadym. Olardyń ýchaskeleriniń nátıjesine men 90% senemin. Qorytyndy kestesin tómeńgi fotodan qarańyz. Barlyq málimetter naqty saılaý komıssııalarynyń protokoldarymen dáleldengen.

Endi jalpy áserlerim jóninde.
Keshe men saılaý júıesiniń ishki asúıinde bolyp shyqtym. Kóptegen asúılerdegideı, onyń ishinde kóriksiz dúnıeler óte kóp. 
Birinshiden, Ortalyq saılaý komıssııasynyń saılaýshylar belsendiligi jónindegi málimetter men táýelsiz baqylaýshylary bar ýchaskelerdiń málimeti jer men kókteı. Aıyrmashylyǵy eki esege deıin bardy. Aqparat jóninde, bizdiń barlyq baqylaǵan ýchaskelerimizdiń belsendiligi 32,58% boldy.
Ekinshiden, saılaý úderisiniń erejelerin buzýshylyqtardyń kóptigin jáne ol Almaty qalasynda bolyp jatqanyn eskersek, barlyq Qazaqstan boıynsha saılaýda qanshama buzylym men jalǵandyq bolǵanyn túsinýge bolady. 
Úshinshiden, votsaptaǵy habarlar boıynsha, burmalaýdyń basym bóligi joǵary oqý oryndary, memlekettik mektepter, bıýdjet qyzmetkerleri, aýyl óńirleri men pogon kıgenderden boldy. 
Tórtinshiden, eń jıi kezdesken zańdy buzýshylyq ol mekeme basshylarynyń ózderiniń qaramaǵynda isteıtin jumyskerlerge jasaǵan qysymy. Olardyń qalaı daýys bergenin fotoǵa túsirtkizý. 
Besinshiden, jalpy saılaý zańy boıynsha saılaý úderisi jaqsy jazylǵan. Máseleniń barlyǵy baqylaýshylardyń azdyǵynda, ne olardyń passıvti nemquraılyǵynda. Biz, qoǵam bolyp, ózimizdiń nemquraılyǵymyzben saılaý ýchaskelerinde bolatyn zańsyzdyqqa jol beremiz. Baqylaýshylardyń qoldarynda kóp nárse bar! Men oǵan óz kózim ábden jetti.

Endi nátıjeler jóninde. 
Men ózim senetin baqylaýshylary bar 20 ýchaskelerdiń nátıjesin taldadym. Jalpy saılaýshylar sany 46 547 boldy. Saılaýǵa 15 167 adam nemese 32,58% qatysty. Toqaevqa 6 943 adam nemese 45,78% daýys berildi. Qosanovqa 6 576 adam nemese 43,36% daýs berildi. Qalǵandaryna 1 107 adam nemese 7,3% daýs berildi. Osy málimetterge súıensek, onda 20 ýchaskelerdiń nátıjesi boıynsha ekinshi týr bolýy kerek.
Aıtpaqshy, eger boıkotshylar saılaýǵa qatysqanda, Qosanovtyń birinshi týrda jeńýge ábden múmkindigi boldy. Men boljaǵandaı, boıkotshylar Toqaevtiń múddesine oınady. 
Sizderdiń esterińde bolar, men saılaýdyń basynda, jýrnalıst Boreıkoǵa bergen sýhbatymda Toqaevqa 69% jasaıdy, al Qosanovqa 15% beredi degen boljam jasaǵanmyn. OSK málimdemesi boıynsha solaı boldy.

Saılaý júıesiniń ishinde bolyp shyqqan soń men ózime kóp nárseni túıip túsindim. Elimizge tereń saıası reformalar kerek. Men oǵan atsalysyp qolymnan kelgenniń bárin jasaımyn. Bizde endi eki-aq jol qaldy, ol saıası reformalar nemese alańǵa shyǵý. Saıası reformalardy bastaý úshin bizde ýaqytta kóp emes, olardy 3-5 aı ishinde bastaý kerek. Olaı istemese, halyqty alańnan eshkim toqtata almaıdy.
Sondyqtan bılik sony eskerip qadam jasaýy kerek, áıtpese kúzimiz ystyq bolaıyn dep tur.

Marǵulan Seısembaıdyń feısbýk paraqshasynan