Shámshıdınova balalardy órtten arashalaǵan stýdentti marapattady

Nur-Sultanda órt shyqqan úıden úsh balany aman alyp qalǵan stýdentti Bilim jáne ǵylym mınıstri Kúlash Shámshıdınova marapattady dep habarlaıdy Qamshy.kz aqparat agenttigi QR BǴM baspasóz qyzmetiniń málimetine súıenip.

Sol kúni Nursultan dostarymen astanalyq saıabaqtardyń birinde serýendep júrgen. Adamdardyń shýlap jatqandyǵyn estigen balalar, oqıǵa oryn alǵan jerge dostarymen tez jetedi. Oqıǵa ornyna jetken kezde úıdiń ekinshi qabatynan er adamnyń kómekke shaqyryp jatqan daýysyn estıdi. Nursultan eshbir kidirmesten tómende ornalasqan dúkenniń shatyry arqyly úıdiń ekinshi qabatyna kóterilip, úıdiń terezesin syndyryp, úsh balany órtke oranǵan páterden alyp shyqqan. Oqıǵa ornyna jetken órt sóndirýshiler páterde qalǵan taǵy bir kishkentaı bóbek pen ákesiniń ómirin arashalap qaldy.

"О́z ómirin táýekelge tigip, qıyndyqqa túsken adamǵa kómek qolyn sozýǵa umtylatyn jastar maqtaýǵa turarlyq. Árıne, osyndaı batyl da erjúrek balany ósirip, tárbıelegen Nursultannyń ata-anasyna alǵys aıtqymyz keledi. Osyndaı jigerli balalardyń qalyptasýy barysynda mektep pen bilim ordalaryndaǵy ustazdardyń atqaratyn róli orasan. Bizdiń ortaq maqsatymyz – óskeleń urpaqtyń kúshti, jigerli, batyl bolyp ósýine barynsha qolymyzdan kelgenshe áreket etý. Nursultan sııaqty jastar – bizdiń zamanymyzdyń naǵyz batyrlary»,- dedi mınıstr Shámshıdınova.