Týrızm áleýetin damytý - mindet

«Mańǵystaý - ashyq aspan astyndaǵy murajaı» degen ataýǵa ıe. Sondyqtan da bul ólkeniń týrıstik áleýeti joǵary. Tabıǵat ana Kaspıı teńizi men shóleıtti aımaqty qatar toǵystyryp, san ǵasyrlyq tarıhy bar jádigerler men qaıtalanbas nysandardy barynsha mol shoǵyrlandyrǵan. Endeshe mundaı ǵajap jerlerge týrızmdi damytýǵa ne kedergi? Saıahatshylardy ólkege kóptep tartý úshin qandaı jobalar júzege asýy kerek? Bul týraly Aqtaýdaǵy óńirlik kásipkerler palatasynda QR «Atameken» UKP Basqarma tóraǵasynyń orynbasary Oljas Ordabaevtyń qatysýymen ótken dóńgelek ústelde málim boldy.

Sharada sóz alǵan «Kazakh Turism» ulttyq kompanııasynyń basqarma tóraǵasy О́rken Bısaqaev: «Mańǵystaý- Qazaqstannyń týrıstik aımaǵy sanalatyn úzdik ondyqqa endi. Aqtaý qalasy men Quryq parom kesheni aralyǵyn qamtıtyn aýmaqtaǵy týrızmdi damytýǵa respýblıkalyq bıýdjetten 18 mlrd tg bólindi. Jaǵajaı demalysyn damytý basty nazarda. Oǵan osyndaǵy ınfraqurylym jasaqtalyp, Aqtaý men «Alaý» lageri joldary jóndeletin bolady»,- deıdi.

Al, QR «Atameken» UKP Basqarma tóraǵasynyń orynbasary Oljas Ordabaevtyń aıtýynsha, Mańǵystaý týrızmin damytý úshin aldymen týrısterdi kútip alý talaptaryn jetildirý kerek. Áýejaı men temirjol vokzalynyń daıyndyǵy qandaı? Kólik joldarynan Aqtaý-Atyraý tas jolynyń sapasy joǵary ekenin kórdik. Al, joldarda týrısterge servıstik qyzmet kórsetý deńgeıin laıyq dep aıta almaımyz. Saıahatshylardy qarapaıym shaıhanamen emes, qyzyqty, tyń jobalarmen tartýdy oılastyrý kerek. «Jobalaý ofısi» jobasy osy jaıttardy júzege asyrýǵa múmkindik beredi.

Dóńgelek ústelde týrıstik aıtaqtarǵa halyqty tartý úshin ishki áýe qatynastaryn ońtaılandyrý usynyldy. Mektep demalysy maýsymynda balalar bıletterin sýbsıdııalaý, bir eresek adamǵa eki balany tegin alyp júrý jaǵdaıyn qarastyrý týrasynda pikir aıtyldy. Sonda otbasy bıýdjeti 30 paıyzǵa únemdelip, halyq shetelge emes, otandyq týrıstik jerlerge ynta bildiredi eken. Týr polısııa qyzmetin qurý, avto kerýen, medısınalyq týrızm, balalar týrızmi t.b damytý ýaqyt enshisinde. Munyń bári Qazaqstandy týrıstik tartymdylyǵy bar 50 eldiń qataryna qosý mindetin júzege asyrýǵa kómektespek.

Ashyq dıalogqa kásipkerler de qatysty. Aqtaý halyqaralyq áýejaıynyń  dırektory  Erǵazy Joldasov: «Iran men Túrkimenstan sııaqty kórshiles elderge reıs asha almaı otyrmyz. Nıet bildirgen kompanııalarǵa ruqsat bıýerilmedi. Kórshi Ázirbaıjanda bul másele joq. Irandyq týrıster Bakýde vızasyz júr. Bakýge týrıster aǵylady. Qosymsha reıster uıymdastyryp jatamyz. Bizge nege sondaı jaǵdaı jasamasqa? Týrısterdi tirkeý áýejaı ǵımaratynda bolýy kerek, olar kóp ýaqytyn qujattarmen áýre-sarsańǵa jumsamaýy tıis. Ishki reısterdi sýbsıdııalaý jedeldetip qolǵa alynsa.Jaz mezgilinde Atyraýdan kúnine 4 reıs jasalady. Osyndaı suranys elimizdiń barlyq aımaǵynan, jaqyn shetelderden de túserine senim mol», dedi.

Basqosýda aıtylǵan barlyq usynystar «Atameken» UKP basshylyǵymen talqylanyp, Úkimetke joldanatyn bolady.